நடிகர் விஜய்யின் ‘ஜனநாயகன்’ மற்றும் சிவகார்த்திகேயனின் ‘பராசக்தி’ ஆகிய படங்கள் தணிக்கைச் சிக்கலில் சிக்கியுள்ள நிலையில், பிரபல தயாரிப்பாளர் தனஞ்செயன் தென்னிந்தியத் தயாரிப்பாளர்கள் மற்றும் இயக்குநர்களுக்கு விடுத்துள்ள பரபரப்பான எச்சரிக்கை பதிவு சமூக வலைதளங்களில் விவாதத்தைக் கிளப்பியுள்ளது.
தனஞ்செயன் விடுத்துள்ள ‘கிளியர் மெசேஜ்’:
‘ஜனநாயகன்’ படத்திற்குத் தணிக்கை வாரியம் கடைசி நேரத்தில் முட்டுக்கட்டை போட்டுள்ளதைச் சுட்டிக்காட்டிய அவர், இனிவரும் காலங்களில் இயக்குநர்களும் தயாரிப்பாளர்களும் மிகவும் எச்சரிக்கையாக இருக்க வேண்டும் என அறிவுறுத்தியுள்ளார்.
பாலிவுட் ஃபார்முலா:
“இனி தென்னிந்தியத் திரையுலகம் பாலிவுட் பாணியைப் பின்பற்ற வேண்டும். ரிலீஸ் தேதிக்குக் குறைந்தது 45 முதல் 60 நாட்களுக்கு முன்பே படத்தைச் சென்சாருக்கு அனுப்ப வேண்டும். சென்சார் சான்றிதழ் கையில் இல்லாமல் ரிலீஸ் தேதியை அறிவிக்காதீர்கள்.”
குட்புக் அரசியல்:
“மேலிடத்தின் ‘குட்புக்கில்’ (Good Book) இல்லாதவர்களின் படங்களுக்கு இனி நெருக்கடியான காலம் காத்திருக்கிறது. அவர்களின் விருப்பத்திற்கு எதிராகப் படம் இருந்தால், அதை ரிலீஸ் செய்ய விடாமல் தடுக்க எந்த எல்லைக்கும் செல்லக்கூடிய சக்திகளை நாம் எதிர்கொள்ள வேண்டியிருக்கும்.”
சினிமா vs அரசியல்:
தனஞ்செயன் தனது பதிவில் #Jananayagan மற்றும் #Parasakthi ஆகிய ஹேஷ்டேக்குகளைப் பயன்படுத்தியுள்ளார். ‘ஜனநாயகன்’ படத்திற்கு மத்திய தணிக்கை வாரியம் முட்டுக்கட்டை போடுவதையும், அதே நேரத்தில் சமகால அரசியல் பின்னணியில் உருவாகியுள்ள ‘பராசக்தி’ படத்திற்கு 23 வெட்டுகளுடன் சான்றிதழ் வழங்கப்பட்டுள்ளதையும் மறைமுகமாகச் சுட்டிக்காட்டியுள்ளார்.
திரையுலகினர் கவலை:
“ஜனநாயகன் படத்திற்கு தனி நீதிபதி உத்தரவிட்டும் கூட, தணிக்கை வாரியம் மேல்முறையீடு செய்து முட்டுக்கட்டை போடுவது சாதாரணமான ஒன்றல்ல. இது ஒரு தெளிவான அரசியல் செய்தி” எனத் திரைத்துறை வல்லுநர்கள் கருத்து தெரிவித்து வரும் நிலையில், தனஞ்செயனின் இந்தப் பதிவு பெரும் முக்கியத்துவம் பெறுகிறது.
ஒட்டுமொத்தமாக, “ஆட்சியாளர்களின் ஆதரவு இல்லாத படங்களுக்கு இனி திரையரங்கு வாசல்கள் எளிதில் திறக்காது” என்பதையே தனஞ்செயன் ஒரு ‘கிளியர் மெசேஜ்’ ஆகத் தெரிவித்துள்ளார்.