தமிழக வெற்றிக் கழகத்தின் தலைவர் விஜய், கரூர் கூட்ட நெரிசல் வழக்கு தொடர்பாக இன்று டெல்லியில் உள்ள சிபிஐ தலைமையகத்தில் ஆஜராகியுள்ளார். இந்த விவகாரம் குறித்துச் சென்னையில் இன்று செய்தியாளர்களிடம் பேசிய தமிழ்நாடு காங்கிரஸ் கமிட்டி தலைவர் செல்வப்பெருந்தகை, விஜய்யின் டெல்லி பயணத்தையும் பாஜகவின் அரசியல் போக்கையும் கடுமையாகச் சாடினார்.
சிங்கத்தின் வாயில் மாட்டிக்கொண்ட விஜய்:
சத்தியமூர்த்தி பவனில் நடைபெற்ற நிகழ்ச்சியில் பேசிய செல்வப்பெருந்தகை, விஜய்யின் தற்போதைய நிலையை ஒரு உவமையுடன் விளக்கினார்,
“சிங்கத்தின் வாயில் இரை தானாகச் சென்று மாட்டிக்கொண்டதைப் போல, விஜய் இப்போது சிபிஐ-யிடம் தானாகச் சென்று சிக்கியுள்ளார். கரூரில் 41 பேர் உயிரிழந்த சம்பவம் மிகப்பெரிய துயரம். அந்த வழக்கை தமிழ்நாடு காவல்துறை ஏற்கனவே மிகவும் நேர்த்தியாகவும், நியாயமான முறையிலும் விசாரித்து வந்தது. மாநில அரசின் விசாரணையில் எந்த மிரட்டலும் இருந்திருக்காது. ஆனால், இப்போது சிபிஐ வசம் இந்த வழக்கு சென்றிருப்பது பல கேள்விகளை எழுப்புகிறது.”
பாஜகவின் ‘சிதைக்கும்’ அரசியல்:
பாஜக தனது அரசியல் லாபத்திற்காகப் புலனாய்வு அமைப்புகளைப் பயன்படுத்துவதாக அவர் குற்றம் சாட்டினார். “தங்களுக்குச் சாதகமாக ஒரு கட்சி வரவில்லை என்றால், அந்தத் தலைவர்களையும் அந்த அமைப்பையும் சிதைப்பதையே பாஜக வாடிக்கையாகக் கொண்டுள்ளது. விஜய்யை மிரட்டிப் பணிய வைக்கவும், தங்கள் கூட்டணிக்குள் இழுக்கவுமே இந்தச் சிபிஐ விசாரணையை ஒரு ஆயுதமாக பாஜக பயன்படுத்துகிறது. ஆனால், பாஜகவின் இந்த ‘அழுத்த அரசியல்’ தமிழ்நாட்டில் ஒருபோதும் வெற்றி பெறாது” என அவர் தெரிவித்தார்.
விஜய்க்கு எச்சரிக்கை:
பாஜகவுக்கு எதிராகக் களமாடுவதாகக் கூறும் விஜய், சிபிஐ-யின் விசாரணை வளையத்திற்குள் சென்றிருப்பது அவரது அரசியல் முதிர்ச்சியின்மையைக் காட்டுகிறதா என்ற கோணத்தில் செல்வப்பெருந்தகை தனது கருத்துக்களை முன்வைத்தார். மேலும், சிபிஐ விசாரணை மூலம் விஜய்யை வளைக்க நினைக்கும் பாஜகவின் கனவு பலிக்காது என்றும் அவர் உறுதிபடக் கூறினார்.