தமிழகத்தில் நாளைக்கு… இந்த 5 மாவட்டங்களில் கனமழை பெய்யும்… வானிலை ஆய்வு மையம் தகவல்…!

தமிழகத்தில் நாளை 5 மாவட்டங்களில் கன மழை பெய்யும் என்று வானிலை ஆய்வு மையம் எச்சரிக்கை விடுத்துள்ளது.

தமிழகத்தில் நாளை முதல் வரும் ஜூலை 17ஆம் தேதி வரை மிதமான மழைக்கு வாய்ப்பு இருப்பதாக சென்னை வானிலை ஆய்வு மையம் தெரிவித்துள்ளது. இது தொடர்பாக வானிலை ஆய்வு மையம் வெளியிட்டுள்ள அறிக்கையில் தெரிவித்துள்ளதாவது: “தமிழகத்தில் இன்று முதல் ஜூலை 17ஆம் தேதி வரை மிதமான மழைக்கு வாய்ப்புள்ளது.

நீலகிரி, கோவை, திருப்பூர், தேனி, திண்டுக்கல் ஆகிய மாவட்டங்களில் நாளை கனமழை பெய்யும். சென்னையில் ஒரு சில இடங்களில் மாலை, இரவில் மழைக்கு வாய்ப்பு இருக்கின்றது. அதிகபட்சம் வெப்பநிலை 34 டிகிரி செல்சியஸ் பதிவாகும். தென் தமிழக கடலோரம், தெற்கு வங்க கடல், அரபு கடல் பகுதிகளில் ஜூலை 15ஆம் தேதி வரை 55 கிலோமீட்டர் வரை காற்று வீசும் என்பதால் மீனவர்கள் கடலுக்கு செல்ல வேண்டாம்” என்று வானிலை ஆய்வு மையம் எச்சரிக்கை விடுத்துள்ளது.