என்னங்க இது, ரிஷப் பண்ட்-க்கு இந்த நிலையா? முன்னாள் வீரர் ஆதங்கம்

துலீப் கோப்பை 2024-25 தொடருக்கான அணிகள் விவரங்களை கடந்த வாரம் பிசிசிஐ வெளியிட்டது. இந்த தொடரில் நான்கு அணிகள் பிரிக்கப்பட்டுள்ள நிலையில், ரிஷப் பண்ட் பி டீமில் இடம்பிடித்துள்ளார். இதில் அனைவரையும் ஆச்சரியப்படுத்தும் விதமாக அந்த அணிக்கு கேப்டன் பொறுப்பு ரிஷப் பண்ட்-க்கு வழங்கப்படவில்லை. மாறாக டீம் பி-யின் கேப்டன் பொறுப்பை அபிமன்யூ ஈஸ்வரனுக்கு பிசிசிஐ வழங்கி இருக்கிறது.

இந்திய அணியின் முன்னாள் வீரர் ஆகாஷ் சோப்ரா பிசிசிஐ முடிவு குறித்து அதிருப்தி தெரிவித்துள்ளார். சில ஆண்டுகளுக்கு முன்பு இந்திய டெஸ்ட் அணியில் ரோகித் சர்மாவுக்கு அடுத்த நிலையில், கேப்டன் பொறுப்பை ஏற்க தகுதியான நபராக பார்க்கப்பட்டவர் ரிஷப் பண்ட் ஆனால் துலீப் கோப்பை தொடரில் அவருக்கு கேப்டன் பொறுப்பு வழங்கப்படவில்லை என்று ஆதங்கம் தெரிவித்தார்.

இது குறித்து பேசிய ஆகாஷ் சோப்ரா, “ரிஷப் பண்ட் கேப்டன் இல்லை. அவர் அபிமன்யூ ஈஸ்வரன் அணியில் தேர்வு செய்யப்பட்டு இருக்கிறார். அவர் அபிமன்யூ ஈஸ்வரன் கேப்டன்சியில் விளையாட இருக்கிறார், இதில் எந்த தவறும் இல்லை. எனினும், டெஸ்ட் கேப்டன்சி பொறுப்பிற்கு கூட ரிஷப் பண்ட் தகுதியானவர் இல்லையா? எனக்கு இது ஆச்சரியமாக இருக்கிறது.”

“இந்த விஷயத்தை என்னால் ஏற்றுக் கொள்ள முடியவில்லை. டெஸ்ட் கிரிக்கெட்டில் சிறப்பாக விளையாடிய ரிஷப் பண்ட்-ஐ தான் நீங்கள் பார்த்தீர்கள். இந்திய கிரிக்கெட் வரலாற்றிலேயே தென் ஆப்பிரிக்கா, இங்கிலாந்து மற்றும் ஆஸ்திரேலியா என மூன்று நாடுகளில் சதம் விளாசிய ஒரே விக்கெட் கீப்பர் இவர் தான். இவர் டெஸ்ட் கிரிக்கெட் விளையாடும் விதம், அவர் ஸ்கோர் செய்யும் விதம், என்னை பொருத்தவரை இவர் தான் கேப்டனாக இருக்க முடியும்.”

“ஆனால், சுப்மன் கில், ருதுராஜ் கெய்க்வாட், ஸ்ரேயஸ் அய்யர் மற்றும் அபிமன்யூ ஈஸ்வரன் கூட கேப்டனாக செயல்படுகிறார், ஆனால் பண்ட் கேப்டன் இல்லை. இதை என்னால் ஏற்க முடியவில்லை. புதிய தலைமை உருவாகி இருக்கிறது. இதனால், ரிஷப் பண்ட்-க்கு கேப்டன் பதவி வழங்காதது குறித்து கவுதம் கம்பீர் என்ன சொல்வார் என்பதை அறிந்து கொள்ள ஆவலாக காத்திருக்கிறேன்,” என்று தெரிவித்தார்.