நான் சிக்ஸ் கொடுத்தாலும், டோனி சொன்னது இதுதான்.. சிஎஸ்கே வீரர் ஓபன் டாக்

சர்வதேச கிரிக்கெட்டில் ஜாம்பவான விக்கெட் கீப்பர், கேப்டனாக அறியப்படுவர் மகேந்திர சிங் டோனி. இந்திய அணி மற்றும் ஐபிஎல் கிரிக்கெட் தொடரில் சென்னை சூப்பர் கிங்ஸ் (சிஎஸ்கே) அணியின் முன்னாள் கேப்டன் எம்எஸ் டோனி பல இளம் வீரர்கள் கிரிக்கெட்டில் ஜொலிக்க ஆலோசனை வழங்கியுள்ளார். கடந்த ஐபிஎல் தொடரில் இருந்து சென்னை அணி கேப்டன் பதவியில் இருந்து விலகிய எம்எஸ் டோனி அணியில் தொடர்ந்து விளையாடி வருகிறார்.

இந்த நிலையில், சிஎஸ்கே அணியின் வேகப்பந்து வீச்சாளர் துஷார் தேஷ்பாண்டே, ஐபிஎல் தொடர்களில் எம்எஸ் டோனியுடனான உரையாடல்கள் பற்றி மனம் திறந்து பேசியுள்ளார். சமீபத்திய இந்தியா மற்றும் ஜிம்பாப்வே அணிகள் இடையிலான தொடர் மூலம் தேஷ்பாண்டே இந்திய அணியில் இடம்பிடித்தார் என்பது குறிப்பிடத்தக்கது.

“நான் சர்வதேச அளவில் தேர்ச்சி பெறுவதற்கான திறமையை கொண்டிருப்பதாக எம்எஸ் டோனி என்னிடம் கூறினார். ஆனாலும், பந்துவீச ஓடும் போது அமைதியாக இருக்க வேண்டும். பந்துவீச ஓடி வரும் போது ரசிகர்கள் எழுப்பும் ஆரவாரத்தால் கவனம் சிதறாமல் இருக்க வேண்டும். ஆழமாக மூச்சு விட்டு, அதன்பிறகு பந்துவீச வேண்டும் என்றார். ஆனால், டோனி இப்படி கூறுவதே ஒரு சாதனை படைத்ததற்கு சமமாதுதான்.”

“என் பந்துகளில் சிக்சர் அடிக்கப்பட்டால், டோனி என்னிடம் நீ எந்த தவறும் செய்யவில்லை. நீ வீசியவை நல்ல பந்துகள் தான். இன்றைய நாள் உனக்கானது இல்லை. அடுத்த போட்டியிலும் இதையே பின்பற்ற வேண்டும் என்று கூறுவார். என்னை ஃபிட்னஸில் கவனமாக இருக்க வேண்டும் என்று டோனி கூறியுள்ளார். வேகப்பந்து வீச்சாளர்கள் உடல்நிலையில் கவனம் செலுத்துவது மிகவும் முக்கியமானது என்று தெரிவித்துள்ளார்,” என்று துஷார் தேஷ்பாண்டே தெரிவித்தார்.