ஒரே ஓவரில் 43 ரன்களை வழங்கிய இங்கிலாந்து பவுலர்

இங்கிலாந்து கிரிக்கெட் அணியின் நட்சத்திர பந்துவீச்சாளர் ஓல்லி ராபின்சன். சமீபத்தில் நடைபெற்ற கவுண்டி கிரிக்கெட்டில் ஓல்லி ராபின்சன் மோசமான பந்துவீச்சை பதிவு செய்தார். சசெக்ஸ் அணிக்காக களமிறங்கிய ஓல்லி ராபின்சன் லெய்செஸ்டர்ஷயர் அணிக்கு எதிரான 2-வது டிவிஷன் போட்டியில் வீசிய ஓவர் அவரை மிகவும் வருத்தத்தில் ஆழ்த்தியது.

இவர் வீசிய முதல் பந்தை லூயிஸ் கிம்பர் என்ற வீரர் சிக்சருக்கு பறக்கவிட்டார். அடுத்த பந்து நோ பால் ஆனது. இதையும் விட்டுவைக்காத லூயிஸ் அதனையும் சிக்சராக மாற்றினார். அடுத்த மூன்று பந்துகளில் லூயிஸ் 4,6,4 என பந்தை பவுண்டரிக்கு விரட்டினார். இதில் 5-வது பந்தும் நோ பால் ஆக அமைந்தது. அடுத்த பந்து சரியாக வீசிய போதும், அது பவுண்டரியை கடந்தது.

அடுத்து வீசிய பந்து மீண்டும் நோ பால் ஆக அமைந்தது. அதையும் லூயிஸ் சிக்சருக்கு பறக்கவிட்டார். இறுதியில் அந்த ஓவரின் கடைசி பந்தை சரியாக வீசிய ஓல்லி ராபின்சன் அதில் 1 ரன்னை மட்டுமே கொடுத்தார். எனினும், இந்த ஓவரில் மட்டும் 6,6,4,6,4,6,4,6,1 என மொத்தம் 43 ரன்கள் அடிக்கப்பட்டன.

ஓவருக்கு ஆறு பந்துகள் வீசப்படும் நிலையில், அனைத்தையும் சிக்சராக அடித்தால் கூட 36 ரன்களை மட்டுமே அடிக்க முடியும். அந்த வகையில், ஓவரில் எக்ஸ்டிராஸ் வீசுவது, அதனை பேட்டர் தனக்கு சாதகமாக மாற்றிக் கொள்ளும் போது ஓவரில் ரன்ரேட் ராக்கெட் வேகத்தில் அதிகரிப்பது தான் இந்த போட்டியில் அரங்கேறி இருக்கிறது.

முன்னதாக 1989-90-க்களில் நடைபெற்ற வெலிங்டன் மற்றும் கேண்டர்பரி அணிகள் இடையிலான போட்டி ஒன்றில் ராபெர்ட் வேன்ஸ் என்ற பந்துவீச்சாளர் ஒரு ஓவருக்கு 77 ரன்களை விட்டுக்கொடுத்தார். இதுவே தற்போது கிரிக்கெட்டில் ஒரு ஓவரில் அடிக்கப்பட்ட அதிகபட்ச ரன்களாக இருக்கிறது.

இங்கிலாந்து அணியின் நட்சத்திர பந்து வீச்சாளரான ஓல்லி ராபின்சன் அந்த அணிக்காக 20 டெஸ்ட் போட்டிகளில் விளையாடி 76 விக்கெட்டுகளை கைப்பற்றி இருக்கிறார்.