முதல் போட்டியிலேயே சச்சின் சாதனையை முறியடித்த முஷீர் கான் – இது லிஸ்ட்-லயே இல்லையே..!

பெங்களூருவில் நடைபெற்று வரும் துலீப் கோப்பை போட்டியில் இந்தியா ஏ மற்றும் இந்தியா பி அணிகள் மோதுகின்றன. இந்த போட்டியில் முதலில் பேட் செய்த இந்தியா பி அணி துவக்கத்தில் விக்கெட்டுகளை இழந்து தடுமாறியது. பிறகு எட்டாவது விக்கெட்டுக்கு ஜோடி சேர்ந்த முஷீர் கான், தனது அணியை சரிவில் இருந்து மீட்டார். இவருடன் ஆடிய நவ்தீப் சைனி தனது விக்கெட்டை பறிக்கொடுக்காமல் ஆடினார்.

இதன் காரணமாக இந்தியா பி அணிக்கு முஷீர் – சைனி ஜோடி எட்டாவது விக்கெட்டுக்கு அதிக ரன்களை குவித்து சாதனை படைத்தது. இதே இன்னிங்ஸில் முஷீர் கான் சிறப்பாக ஆடி 181 ரன்களை குவித்தார். 373 பந்துகளை எதிர்கொண்ட முஷீர் கான் 16 பவுண்டரிகள், 5 சிக்சர்களுடன் இந்த ரன்களை எடுத்தார். இதன் மூலம் துலீப் கோப்பை தொடரின் அறிமுக போட்டியில் அதிக ரன்கள் அடித்தவர்கள் பட்டியலில் முஷீர் கான் சாதனை படைத்துள்ளார்.

துலீப் கோப்பை தொடரின் அறிமுக போட்டியிலேயே அதிக ரன்களை அடித்தவர்கள் பட்டியலில் முஷீர் கான் தற்போது மூன்றாவது இடத்தில் உள்ளார். முதல் இரு இடங்களில் பாபா அபரஜித் மற்றும் யாஷ் தல் ஆகியோர் உள்ளனர். சர்வதேச கிரிக்கெட்டில் லெஜண்ட் வீரரான சச்சின் டெண்டுல்கர் துலீப் கோப்பை அறிமுக போட்டியில் 159 ரன்களை அடித்து இருந்தார்.

தற்போதைய துலீப் கோப்பை தொடரின் அறிமுக போட்டியில் முஷீர் கான் 181 ரன்களை அடித்து சச்சின் டெண்டுல்கர் சாதனையை முறியடித்துள்ளார். அறிமுக போட்டியில் சிறப்பாக ஆடியதோடு, சரிவில் இருந்த தனது அணியை மீட்டது முஷீர் கானுக்கு பாராட்டுக்களை பெற்று தந்துள்ளது.