T20 WorldCup: இயற்கையும் எதிராகத்தான் இருக்கு…`Bye Bye’ பாகிஸ்தான்!

டி20 உலகக் கோப்பையின் சூப்பர் 8 சுற்றுக்கு குரூப் ஏ-வில் இருந்து இந்தியாவை அடுத்து அமெரிக்கா தகுதிபெற்ற நிலையில் பாகிஸ்தான் வெளியேறியது.

அமெரிக்கா – வெஸ்ட் இண்டீஸில் நடைபெற்றும் டி20 உலகக் கோப்பை தொடர் அடுத்த கட்டத்தை நோக்கி நகர்ந்திருக்கிறது. தென்னாப்பிரிக்கா, ஆஸ்திரேலியா, இந்தியா, ஆஃப்கானிஸ்தான், வெஸ்ட் இண்டீஸ் அணிகள் சூப்பர் 8 சுற்றுக்குத் தகுதிபெற்ற நிலையில், அமெரிக்கா – அயர்லாந்து இடையிலான லீக் போட்டி ஃபுளோரிடாவில் நேற்று நடைபெற இருந்தது.

இந்தப் போட்டியில் அமெரிக்கா தோல்வியடைந்தால் மட்டுமே பாகிஸ்தானால் அடுத்த சுற்றுக்குப் போக முடியும் என்கிற நிலை. ஆனால், அமெரிக்கா – அயர்லாந்து போட்டி மழையால் ஒரு பந்துகூட வீசப்படாத நிலையில் கைவிடப்பட்டது. இதனால், குரூப் ஏ-வில் இந்தியாவைத் தொடர்ந்து அமெரிக்கா இரண்டாவது அணியாக சூப்பர் 8 சுற்றுக்குத் தகுதிபெற்றது.

ஏற்கனவே நியூசிலாந்து வெளியேறியிருந்த நிலையில், 2022 ஃபைனலிஸ்டான பாகிஸ்தானும் லீக் சுற்றோடு வெளியேறியிருக்கிறது. கடந்த 2022 டி20 உலகக் கோப்பை தொடரிலிருந்து இந்திய அணி வெளியேறியபோது, அடிலெய்டு – மும்பை விமான டிக்கெட் மாதிரியைப் பகிர்ந்து பாகிஸ்தான் கிரிக்கெட் வாரிய ட்விட்டர் ஹேண்டிலில் `Bye Bye India; Have a safe Flight’ என்ற வாசகத்தோடு சீண்டல் பதிவு இடப்பட்டிருந்தது. அந்த ட்வீட்டை இப்போது பகிர்ந்து பாகிஸ்தானுக்கு `Bye Bye’ சொல்லி வருகிறார்கள் இந்திய ரசிகர்கள்!