15 ஆண்டுகள் ஒரே அட்வைஸ் கொடுத்த டோனி.. அஸ்வினுக்கு இப்போ தான் புரிந்ததாம்!

உலக கிரிக்கெட்டில் மிகவும் பிரபலமான சுழற்பந்து வீச்சாளர்களில் ஒருவர் ரவிச்சந்திரன் அஸ்வின். ஐபிஎல் தொடரில் எம்எஸ் டோனி தலைமையிலான சென்னை சூப்பர் கிங்ஸ் அணியில் விளையாட துவங்கிய அஸ்வின், அதன்பின் பிரபல சுழற்பந்துவீச்சாளர் ஆனார். இன்றும் இந்திய டெஸ்ட் அணியில் ரவிச்சந்திரன் அஸ்வின் சிறப்பாக செயல்பட்டு வருகிறார்.

எம்எஸ் டோனி தலைமையில் விளையாடி இருக்கும் அஸ்வின் அவர் கூறிய அறிவுரையை 15 ஆண்டுகள் வரை புரிந்து கொள்ள முடியாமல் இருந்ததாக தெரிவித்துள்ளார். தனியார் நிறுவனம் ஒன்றுக்கு பேட்டியளித்த அஸ்வின், எம்எஸ் டோனிக்கு தன்னை ஒரு வருடம் வரை தெரியாமல் இருந்ததாக தெரிவித்தார். எனினும், டோனி தலைமையில் விளையாடிய பிறகு சக்திவாய்ந்த பச்சுவீச்சாளராக உருவெடுத்துள்ளார்.

இது குறித்து பேசிய அஸ்வின், “ஒரு வருடம் வரை டோனிக்கு என்னை தெரியாது என்றே நினைக்கிறேன். அவருக்கு தெரிந்திருக்குமா, தெரியாமல் இருந்ததா என்பது எனக்கு தெரியாது. ஆனால் அது தான் டோனி. அவரை கிட்டத்தட்ட 15 முதல் 16 ஆண்டுகள் வரை எனக்கு தெரியும். அவர் 2008-09 ஆகிய காலக்கட்டங்களில் இருந்ததை போன்றே தற்போதும் இருக்கிறார்.”

“அவர் என்னிடம் எப்போதும் கூறியது இதுமட்டும் தான். உண்மையான பலம், புதிய விஷயங்களை முயற்சிப்பதில் தான் இருக்கிறது. எப்போதும் Funky-ஆக இரு. அதை மட்டும் யாருக்காகவும் மாற்றிக் கொள்ளாதே. வித்தியாசமாக பந்துவீசுவதில் பணியாற்றுவதை மறந்துவிடாதே என்று தெரிவித்தார். அவர் பல சமயங்களில் என்னிடம் அடிக்கடி கூறிய விஷயம் ஒன்றுதான். எப்போதும் Funky-ஆக இரு, உன்னை வெளிப்படுத்து என்பது மட்டும் தான்.”

“அந்த வகையில் அவர் ஒருத்தரிடம் இருந்து கிரிக்கெட்டை தாண்டி அவர் எந்த அளவுக்கு மன உறுதியுடன் இருக்கிறார் என்பதை எம்எஸ் டோனி அதிகம் மதிப்பிடுகிறார். இதை வைத்து தான் அவர் துஷார் தேஷ்பாண்டேவை சிஎஸ்கே அணியில் தேர்வு செய்தார்,” என்று தெரிவித்தார்.