தோள் மீது பாசமாக கை போட்ட பாக். கேப்டன், தட்டிவிட்ட ஷாகின் ஷா அப்ரிடி

உலக டெஸ்ட் சாம்பியன்ஷிப் தொடரில் தங்களது முதலாவது போட்டியை வெல்ல வேண்டும் என்ற பாகிஸ்தானின் கனவு நேற்று நிறைவேறாமல் போனது. பாகிஸ்தானுக்கு சுற்றுப் பயணம் மேற்கொண்டு விளையாடி வரும் வங்கதேசம் அணி முதலாவது டெஸ்ட் போட்டியில் பத்து விக்கெட் வித்தியாசத்தில் அபார வெற்றி பெற்றது. டெஸ்ட் கிரிக்கெட் வரலாற்றில் வங்கதேசம் அணி பாகிஸ்தானை வீழ்த்தி வெற்றி பெற்றது அதுவே முதல் முறை ஆகும்.

நேற்றைய வெற்றி காரணமாக இரு போட்டிகள் கொண்ட டெஸ்ட் தொடரில் வங்கதேசம் அணி 1-0 என்ற கணக்கில் முன்னிலை பெற்றுள்ளது. தொடரின் வெற்றியாளரை தீர்மானிக்கும் இறுதிப் போட்டி வருகிற 30 ஆம் தேதி நடைபெற இருக்கிபறது. இந்த போட்டியும் முதல் போட்டி நடைபெற்ற ராவல்பிண்டியில் தான் நடைபெறுகிறது.

இந்த நிலையில், முதல் டெஸ்ட் போட்டியின் போது எடுக்கப்பட்ட வீடியோ தற்போது சமூக வலைதளங்களில் அதிகம் பகிரப்படுகிறது. அதில் பாகிஸ்தான் கேப்டன் ஷான் மசூத் வேகப்பந்து வீச்சாளர் ஷாகின் ஷா அப்ரிடியின் தோள் மீது கை வைக்கிறார். சிறிது நேரம் அமைதி காத்த ஷாகின் ஷா அப்ரிடி பிறகு கேப்டன் ஷானின் கையை தனது தோள் மீது இருந்து தூக்கிவிட்டார்.

முன்னதாக ஷாகின் ஷா அப்ரிடி பாகிஸ்தான் அணியின் தலைமை பயிற்சியாளர் ஜேசன் கில்லெஸ்பியிடம் கடுமையாக வாக்குவாதம் செய்யும் காட்சிகள் அடங்கிய வீடியோ சமூக வலைதளங்களில் வைரல் ஆனது. தற்போது கேப்டனின் கையை தனது தோளில் இருந்து ஷாகின் எடுத்துவிடும் காட்சிகள் சமூக வலைதளங்களில் பகிரப்பட்டு வருகிறது.

முதல் டெஸ்ட் போட்டியில் வங்கதேசம் அணியின் மெஹிடி ஹாசன் மற்றும் ஷகிப் அல் ஹாசன் அபாரமாக பந்துவீசினர். இருவரும் சேர்ந்து ஏழு விக்கெட்டுகளை சாய்த்த நிலையில், பாகிஸ்தான் அணி 55.5 ஓவர்களில் 146 ரன்களில் அனைத்து விக்கெட்டுகளையும் இழந்தது. இதன் காரணமாக வங்கதேசம் அணி 30 ரன்களை எடுத்தால் வெற்றி என்ற இலக்குடன் களமிறங்கியது.

வங்கதேசம் அணிக்கு துவக்க வீரர்களாக களமிறங்கிய ஜாகிர் ஹாசன் மற்றும் ஷத்மான் இஸ்லாம் ஜோடி 6.3 ஓவர்களில் வெற்றி இலக்கை துரத்தி பத்து விக்கெட்டுகள் வித்தியாசத்தில் வெற்றி பெற்றது.