மகளிர் ஆசிய கோப்பை: 114 ரன்களில் மலேசியாவை வீழ்த்திய வங்காளதேசம், அரையிறுதியில் இந்தியாவுடன் மோதல்

இலங்கையில் நடைபெற்று வரும் மகளிர் ஆசிய கோப்பை கிரிக்கெட் தொடரில் வங்காளதேசம் மற்றும் மலேசியா அணிகள் மோதின. இந்த போட்டியில் டாஸ் வென்ற வங்காளதேசம் அணி முதலில் பேட் செய்தது. வங்காளதேசம் அணிக்கு துவக்க வீராங்கனைகள் திலாரா அக்தர் மற்றும் முர்சிதா கதுன் முறையே 33 மற்றும் 80 ரன்களை விளாசினர்.

அடுத்து களமிறங்கிய கேப்டன் நிகர் சுல்தானா 37 பந்துகளில் 62 ரன்களை விளாசினார். ருமானா அகமது 6 ரன்களை எடுத்தார். இதன் காரணமாக வங்காளதேசம் அணி 20 ஓவர்கள் முடிவில் 2 விக்கெட்டுகளை மட்டும் இழந்து 191 ரன்களை குவித்தது. மலேசியா சார்பில் மஹிரா இசாதி இஸ்மாயில் மற்றும் எல்சா ஹண்டர் தலா ஒரு விக்கெட் வீழ்த்தினர்.

கடின இலக்கை துரத்திய மலேசிய அணிக்கு சரியான துவக்கம் கிடைக்கவில்லை. அந்த அணியின் துவக்க வீராங்கனை ஹமிசா ஹஷிம் ரன் ஏதும் எடுக்காமல் நடையை கட்டினார். இவருடன் களமிறங்கிய வான் ஜூலியா 11 ரன்களில் அவுட் ஆனார். அடுத்து வந்த எல்சா ஹண்டர் 20 ரன்களை எடுத்து அவுட் ஆக, இவருடன் ஆடிய மஹிரா இசாதி இஸ்மாயில் 15 ரன்களில் அவுட் ஆனார்.

இவர்களை தொடர்ந்து களமிறங்கிய மற்ற வீராங்கனைகள் சொற்ப ரன்களில் ஆட்டமிழந்தனர். போட்டி முடிவில் மலேசியா அணி 8 விக்கெட்டுகளை இழந்து 77 ரன்களை மட்டுமே சேர்த்தது. இதனால் வங்காளதேசம் அணி 114 ரன்களில் வெற்றி பெற்றது. வங்காளதேசம் சார்பில் நஹிரா அக்தர் 2 விக்கெட்டுகளை வீழ்த்தினார்.

இவர் தவிர ஜனரா அலாம், சபிகும் நஹர் ஜெஸ்மின், ரபியா கான், ரிது மோனி மற்றும் ஷொர்னா அக்தர் தலா ஒரு விக்கெட் வீழ்த்தினர். இந்த போட்டியில் வெற்றி பெற்றதை தொடர்ந்து வங்காளதேசம் அணி மகளிர் ஆசிய கோப்பை தொடரின் அரையிறுதி போட்டிக்கு முன்னேறியது. அரையிறுதி போட்டியில் வங்காளதேசம் அணி இந்தியாவை எதிர்கொள்கிறது.