வங்கதேச மாணவர் போராட்ட வன்முறை… கண்டதும் சுட உத்தரவு!

வங்கதேச மாணவர் போராட்டத்தில் ஏற்பட்ட வன்முறையால் இதுவரை 100-க்கும் மேற்பட்டோர் பலியான நிலையில், நாடு முழுவதும் ஊரடங்கு உத்தரவு பிறப்பிக்கப்பட்டிருக்கிறது.

வங்கதேச விடுதலை வீரர்களின் சந்ததிகளுக்கு 30% இடஒதுக்கீடு வழங்கும் முடிவுக்கு எதிர்ப்புத் தெரிவித்து நாடு முழுவதும் மாணவர்கள் போராட்டம் நடத்தி வருகிறார்கள். தலைநகர் டாக்கா உட்பட பல்வேறு நகரங்களில் வன்முறை வெடித்ததன. போராட்டத்தில் ஈடுபட்ட மாணவர்கள் மீது போலீஸார் மற்றும் ராணுவப் படையினர் தாக்குதல் நடத்திய சம்பவமும் பல இடங்களில் நடந்தது.

வன்முறை தொடர்பான சம்பவங்களில் இதுவரை 100-க்கும் மேற்பட்டோர் கொல்லப்பட்டுள்ள நிலையில், இந்த வழக்கில் வங்கதேச உச்ச நீதிமன்றம் விசாரித்து வருகிறது. தீர்ப்பு வர இருக்கும் நிலையில், வங்கதேசம் முழுவதும் கடுமையான ஊரடங்கு உத்தரவு பிறப்பிக்கப்பட்டிருக்கிறது.

வெளியே குழுவாக கூடினால், கண்டவுடன் சுட உத்தரவும் பிறப்பிக்கப்பட்டுள்ளது. இணையம்‌ மற்றும் மின்சாரம் துண்டிக்கப்பட்டிருப்பதுடன், விமான சேவைகளும் ரத்து செய்யப்பட்டிருக்கின்றன. மாணவர்களின் போராட்டம் வன்முறையாக மாறியதால் வங்கதேசம் முழுவதும் அசாதாரண சூழல் நிலவுகிறது.