தள்ளிப்போகுதா தவெக மாநாடு?…தலைகால் புரியாமல் தவிக்கும் தளபதி ரசிகர்கள்…

 

நடிகர் விஜய் நடித்துள்ள “தி கோட்” திரைப்படம் இம்மாதம் ஐந்தாம் தேதி உலகம் முழுவதும் ரிலீஸாகி வெற்றி நடைபோட்டு வருகிறது. இந்நிலையில் விஜயின் அடுத்த படம் குறித்த அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது. இதுதான் விஜயின் கடைசி திரைப்படமாக இருக்கும் என அவரது தரப்பிலிருந்து தகவல்கள் வெளியாகியிருந்தது. காரணம் நடிகர் விஜய் அரசியலில் தீவிரம் காட்டப்போவதாக அறிவித்ததால்.

தமிழக வெற்றிக் கழகம் என்ற பெயரில் தனது புதிய கட்சியை துவங்கியிருக்கும் விஜய், சமீபத்தில் கட்சிக் கொடியையும், கொடிப்பாடலையும் வெளியிட்டார். இந்நிலையில் தமிழக வெற்றிக் கழகத்தின் முதல் அரசியல் மாநாடு வருகிற இருபத்தி மூன்றாம் தேதி நடத்தப்படும் என எதிர்பார்க்கப்பட்டது.

ஆனால் இந்த மாநாடு அடுத்த மாதமான அக்டோபருக்கு ஒத்திவைக்கப்படலாம் என்ற தகவல் தற்போது வெளியாகி இருப்பதாக பிரபல தனியார் தொலைக்காட்சியில் செய்தி வெளியாகியுள்ளது.

மாநாடு நடத்தப்பட உள்ள தேதி குறித்த உறுதியான அறிவிப்பை காவல் துறையினரிடம் செப்டம்பர் பதிமூன்றாம் தேதியன்று தெரிவிப்பதாக தமிழக வெற்றிக் கழகத்தின் பொதுச்செயலாளர் புஸ்ஸி ஆனந்த் சொல்லியிருந்தார்.

இந்நிலையில் மாநாடு முன்னர் சொன்னப்பட்ட தேதியில் நடத்தப்படுமா? அல்லது வேறு தேதிக்கு மாற்றப்படுமா? என்ற குழப்பமான நிலை விஜய் ரசிகர்கள் மற்றும் விஜய் கட்சி நிர்வாகிகள், தொண்டர்களிடம் ஏற்பட்டுள்ளது.

அரசியல் மாநாட்டிற்கு அனுமதி கொடுப்பதற்காக தமிழக வெற்றிக் கழகத்திடம் காவல் துறையினர் சார்பில் பல்வேறு கேள்விகள் கேட்கப்பட்டிருந்தது. அதற்கான பதில்களும்,  விளக்கமும் விஜய் கட்சி சார்பில் சொல்லப்பட்டிருந்தது.