குளித்து கும்மாளம் போட சரியான நேரம் இது தானா?….களைகட்டிய குற்றாலம்…

குற்றால அருவிகளில் நீர் வரத்து கடந்த சில நாட்களாகவே அதிகமாகவே இருந்து வருகிறது. சென்னை வானிலை ஆய்வு மையம் சொல்லியிருந்தது போல மலைப்பகுதிகளில் பெய்து வந்த மழையால் அருவிகளில் விழும் தண்ணீரின் அளவு அதிகரித்தது. இந்த மாத துவக்கத்தில் ஒரு சில நாடகள் மந்தமான நிலை குற்றாலத்தில் இருந்து வந்தாலும், கடந்த சில நாட்களாக இருந்து வரும் நிலைமை தலை கீழ் என்று தான் சொல்ல வைத்து விட்டது.

குற்றாலத்தின் பிரதான அருவிகளான ஃபைவ் ஃபால்ஸ், மெயின் அருவி, பழைய குற்றால அருவிகளில் தண்ணீர் ஆர்ப்பரித்து கொட்டி வருகிறது. வெள்ளப்பெருக்கு ஏற்பட்டதால் முன்பு குளிக்க தடை விதிக்கப்பட்டது போன்ற நிலைமைகள் ஏதும் இல்லாததால் குதூகலமாக காணப்பட்டது குற்றாலம். வெயிலின் தாக்கமும் சற்று குறைவாகவே இருந்து வந்தாலும், அருமையான காற்றும் வீசி வருகிறது. சாரல் விழுவதில் தான் சிறிது மாற்றம் ஏற்பட்டிருந்தது.

old falls (இன்று காலை பதினோரு மணி நிலவரம்)

திடீர்,திடீரென விழுந்த சாரலால் மகிழ்வு கிடைத்து வந்தது. இன்று காலை பதினோரு மணி நிலவரப்படி குற்றாலத்தின் முக்கிய அருவிகளான ஃபைவ் ஃபால்ஸ், பழைய குற்றாலம், மெயின் உள்ளிட்ட மூன்று அருவிகளிலும் தண்ணீரின் வரத்து படு ஜோராகவே இருந்தது. வாரத்தின் வேலை நாள் என்றாலும் இன்ரு கூட்டம் அதிக அளவிலே காணப்பட்டது. வார இறுதி நாட்களில் வரும் கூட்டம் போலவே தான் இருந்தது இன்றைய நிலை. இந்த நிலை இனி வரும் நாட்களிலும் நீடித்தால் இங்கு வரும் மக்களுக்கு மகிழ்ச்சி இன்னும் அதிகரிக்கும்.