ஓப்பனிங்க விட பினிசிங் சூப்பர்!…ஐந்து பந்துகளிலேயே முடிந்து போன கிரிக்கெட் போட்டி!…

உலகம் முழுவதும் தனக்கென தனி ரசிகர் பட்டாளத்தையே கொண்டுள்ளது கிரிக்கெட் விளையாட்டு. இந்த வகையான விளையாட்டை பற்றி அறிந்திராத நாடுகள் கூட இதன் மீது அதிக ஆர்வம் காட்டி வருகிறது. மிக நீண்ட வரலாற்றினை தனக்குள் கொண்டுள்ள கிரிக்கெட் போட்டிகள் ஐந்து நாட்கள் நடத்தப்படும் டெஸ்ட் போட்டி, ஐம்பது ஓவர்களை உள்ளடக்கிய ஒரு நாள் சர்வதேச போட்டி என இரண்டு விதமாக விளையாடப்பட்டு வந்தது.

இரு பரிணாமங்களில் வெகு ஆண்டுகளாக சர்வதேச போட்டிகள் விளையாடி வரப் பட்ட நிலையில், சமீபத்தில் போட்டியின் விறுவிறுப்பை அதிகரிக்கும் விதமான இருபது ஓவர் போட்டிகள் அறிமுகப்படுத்தப்பட்டது.

டெஸ்ட், ஒரு நாள் போட்டிகள் போலவே இந்த வகையான போட்டியிலும் உலக சாம்பியன்களை அடையாளப்படுத்தும் விதமான உலகக் கோப்பை போட்டி தொடர்களும் நடத்தப்படுகிறது. சமீபத்தில் அமெரிக்கா மற்றும் மேற்கு இந்தியத் தீவுகளில் நடந்த உலகக் கோப்பை தொடரின் இறுதிப் போட்டியில் பலம் மிக்க தென் ஆப்பிரிக்க அணியை வீழ்த்தி உலக சாம்பியன் பட்டத்தை வென்றுள்ளது இந்திய அனி.

இந்நிலையில் 2026ம் ஆண்டு டி-20 உலகக்கோப்பை தொடருக்கான தகுதிப் போட்டியில் சிங்கப்பூர் அணியும், மங்கோலியா அணியும் மோதின.

முதலில் பேட்டிங் செய்த மங்கோலியா அணி பத்து ரன்களை மட்டுமே எடுத்து அனைத்து விக்கெட்டுகளையும் இழந்தது. பதினோறு ரன்கள் எடுத்தால் வெற்றி என்ற எளிய இலக்குடன் களமிறங்கிய சிங்கப்பூர் அணி முதல் ஓவரின் ஐந்தாவது பந்திலேயே வெற்றி பெற்று விட்டது.

ஐந்து பந்துகளில் அந்த அணி பதிமூன்று ரன்களைப் பெற்று வெற்றிக் கனியை ருசி பார்த்தது. மிகக் குறுகிய நேரத்திலேயே முடிவினை எட்டிய போட்டியாக இந்த போட்டி அமைந்தது. அதே போன்று இருபது ஓவர் போட்டிகளில் இரண்டாவது இன்னிங்ஸ் வெறும் ஐந்து பந்துகளில் முடிவடைந்த முதல் போட்டியாகவும் சிங்கப்பூர், மங்கோலியா அணிகளுக்கு இடையே நடந்த இந்தப் போட்டி மாறியுள்ளது.