சிமென்ட் பிட்ச்ல கூட பும்ரா மாஸ் காட்டுவாரு.. முன்னாள் பாக். வீரர் புகழாரம்

சர்வதேச கிரிக்கெட்டில் தற்போது முன்னணி வேகப்பந்து வீச்சாளர்களில் ஒருவராக இருப்பவர் இந்திய அணியின் ஜஸ்பிரித் பும்ரா. தனது அபார பந்துவீச்சின் மூலம் எதிரணியை திணறடிக்க செய்வதில் பும்ரா கைத்தேர்ந்தவர். கிரிக்கெட் அரங்கில் பல முன்னணி வீரர்கள், வல்லுநர்கள் அவ்வப்போது பும்ராவை புகழ்வது புதிதல்ல.

இந்த வரிசையில், பாகிஸ்தான் அணியின் முன்னாள் வீரர் பசித் அலி இந்திய வீரர் பும்ராவுக்கு புகழாரம் சூட்டியுள்ளார். இது குறித்து பேசும் போது, சிமென்ட் பிட்ச்களில் கூட எதிரணி வீரர்களை மிரட்டும் அளவுக்கு பும்ரா சிறப்பானவர் என்று பசித் அலி தெரிவித்தார்.

சில மாதங்களுக்கு முன்பு நடைபெற்று முடிந்த டி20 உலகக் கோப்பை கிரிக்கெட் தொடரில் ஜஸ்பிரித் பும்ரா தொடர் நாயகன் விருது வென்றிருந்தார் என்பதும் குறிப்பிடத்தக்கது.

“சிமென்ட் பிட்ச்-இல் பும்ராவை பந்துவீச செய்தால் கூட, அவரது வித்தியாசமான உடல்மொழி பேட்டர்களை நிலைகுலைய செய்யும். இதுதான் நிதர்சனம். மற்ற பந்துவீச்சாளர்களால் இது முடியாது. அவர்களுக்கு இவ்வாறு செய்ய ஃபார்ம் மற்றும் ரிதம் அவசியம் தேவைப்படும்.”

“அவர் வருவார், விக்கெட் எடுப்பார், இதைத் தொடர்ந்து அடுத்த ஸ்பெல்-இல் மூன்று விக்கெட்டுகளை சாய்ப்பார். அவர் பேட்டர்களை எந்த விஷயத்திலும் கணிக்க முடியாத அளவுக்கு செயல்படுபவர்.”

“அவர் வீசும் ஸ்லோ பந்துகள் மிகவும் கச்சிதமாக இருக்கும். வெள்ளை பந்து கிரிக்கெட்டில் வீசும் வகையிலான பந்துகளை கொண்டு டெஸ்ட் கிரிக்கெட்டிலும் விக்கெட் வீழ்த்தும் திறமை கொண்டவர். அவர் மிகவும் ஸ்பெஷல்,” என்று யூடியூப் சேனலில் பேசிய பசித் அலி தெரிவித்தார்.