13-க்கு 10… இடைத்தேர்தலில் சொல்லியடித்த இந்தியா கூட்டணி!

தமிழ்நாடு, பஞ்சாப், ஹிமாச்சலப்பிரதேசம் உள்ளிட்ட 7 மாநிலங்களில் 13 சட்டப்பேரவைத் தொகுதிகளுக்கு நடந்த இடைத்தேர்தல்களில் 10 தொகுதிகளில் இந்தியா கூட்டணி வெற்றிபெற்றிருக்கிறது.

நாடு முழுவதும் மக்களவைத் தேர்தல்கள் நடந்துமுடிந்த ஒரு மாதத்திற்குப் பிறகு கடந்த 10-ம் தேதி 7 மாநிலங்களில் காலியாக இருந்த 13 சட்டப்பேரவைத் தொகுதிகளுக்கு இடைத்தேர்தல் நடந்தது. இதில், பதிவான வாக்குகள் எண்ணப்பட்டு இன்று முடிவுகள் அறிவிக்கப்பட்டன.

பஞ்சாபின் ஜலந்தர் தொகுதியில் ஆம் ஆத்மி வேட்பாளர் மொஹிந்தர் பகத், தன்னை எதிர்த்துப் போட்டியிட்ட பாஜக வேட்பாளர் ஷீத்தலை 37,325 வாக்குகள் வித்தியாசத்தில் தோற்கடித்தார். ஹிமாச்சலப்பிரதேசத்தின் டேரா தொகுதியில் காங்கிரஸ் வேட்பாளர் கமலேஷ் தாக்குர் வெற்றிபெற்றார்.

இதேபோல், மேற்குவங்கத்தின் ராய்கஞ்ச், பக்தா, ராணாகட் மற்றும் மணிகட்ல என 4 தொகுதிகளிலும் ஆளும் திரிணாமுல் காங்கிரஸ் கட்சி வெற்றிக்கொடி நாட்டியது. விக்கிரவாண்டியில் திமுகவும் உத்தராகண்ட் மங்கலூர், பத்ரிநாத், ஹிமாச்சலப்பிரதேசத்தின் நலாகர்க் உள்ளிட்ட தொகுதிகளில் காங்கிரஸ் வெற்றிபெற்ற நிலையில், பீகாரின் ரபௌலி தொகுதியில் சுயேட்சை வேட்பாளரான ஷங்கர் சிங், ஆளும் கட்சியான ஐக்கிய ஜனதாதள வேட்பாளரைத் தோற்கடித்து வெற்றிபெற்றார்.

ஹிமாச்சலப்பிரதேசத்தின் ஹமிர்பூர் மற்றும் மத்தியப்பிரதேசத்தின் அமர்வாரா என இரண்டு தொகுதிகளில் மட்டுமே பாஜக வேட்பாளர்கள் வெற்றிபெற்றனர்.