INDvsBAN டெஸ்ட்: பிட்ச் பஞ்சாயத்து.. நெத்தியடி பதில், விமர்சகர்களின் வாயடைத்த கம்பீர்

இந்தியாவுக்கு சுற்றுப் பயணம் மேற்கொண்டுள்ள வங்கதேசம் அணி இரண்டு போட்டிகள் கொண்ட டெஸ்ட் தொடரில் விளையாடுகிறது. இரு அணிகள் இடையிலான முதல் போட்டி, சென்னை சேப்பாக்கம் மைதானத்தில் இன்று (செப்டம்பர் 19) துவங்கியது. இந்த போட்டியில் இந்திய அணி முதலில் பேட்டிங் செய்து வருகிறது.

இந்தியா மற்றும் வங்கதேசம் டெஸ்ட் போட்டி துவங்கும் முன்பே இந்திய பிட்ச் குறித்த விமர்சனங்கள் எழத் துவங்கின. இது குறித்த கேள்வியை எதிர்கொண்ட இந்திய அணியின் தலைமை பயிற்சியாளர் கவுதம் கம்பீர், தனக்கே உரிய பாணியில் பதில் அளித்து, விமர்சகர்களின் வாயை அடைத்துள்ளார்.

“இந்திய அணி தென் ஆப்பிரிக்கா செல்லும் போது, டெஸ்ட் போட்டி இரண்டு நாட்களில் முடிந்துவிடும். அங்குள்ள பிட்ச் வேகப்பந்து வீச்சாளர்களுக்கு சாதகமாக அமைக்கப்பட்டு இருக்கும், ஆனால் அதைப் பற்றி யாரும் பேசுவதில்லை. இது குறித்த விவாதங்கள் முடிவுக்கு வர வேண்டும். இந்தியாவில் டெஸ்ட் போட்டிகள் இரண்டு நாட்களில் முடிந்துவிடும் என்று கூறிவிட முடியாது. எதிரணி வீரர்கள் சுழற்பந்துவீச்சுக்கு எதிராக விளையாட கற்றுக் கொள்ள வேண்டும்.”

“எங்களது பேட்டிங் யூனிட் எத்தகைய சுழற்பந்துவீச்சையும் எதிர்கொள்ளும் திறன் கொண்டுள்ளது. ஒருநாள் போட்டி மற்றும் டெஸ்ட் போட்டி இடையே ஏராளமான வித்தியாசங்கள் உள்ளன. ஒருக்கட்டத்தில் இந்திய அணி பேட்டிங்கில் மிகவும் வலுவாக இருந்துவந்துள்ளது. தற்போது பும்ரா, ஷமி, அஷ்வின் மற்றும் ஜடேஜா போட்டியை பந்துவீச்சாளர்கள் பக்கம் திருப்பியுள்ளனர்,” என்று கவுதம் கம்பீர் தெரிவித்தார்.