செங்கல்பட்டில் பள்ளிக் குழந்தைகள் கடத்தலா… உண்மையில் என்ன நடந்தது?

செங்கல்பட்டில் பள்ளிக் குழந்தைகள் கடத்தப்பட்டதாக வெளியான செய்தி உண்மைக்குப் புறம்பானது என்று விசாரணையில் தெரியவந்திருக்கிறது.

செங்கல்பட்டு ஓமலூர் பகுதியைச் சேர்ந்த வேலன் – ஆர்த்தி தம்பதிக்கு 11 வயதான ரட்சிதா மற்றும் 7 வயதான நிதின் என்ற இரண்டு குழந்தைகள் உள்ளனர். இவர்கள் இருவரும் ஓமலூர் ஆதி திராவிடர் நடுநிலைப் பள்ளியில் படித்து வருகிறார்கள். கடந்த ஓராண்டுக்கு முன்பு வேலன் – ஆர்த்தி இடையே கருத்து வேறுபாடு ஏற்பட்ட நிலையில், இருவரும் பிரிந்து வாழ்கிறார்கள்.

வேலன் குழந்தைகளுடன் ஓமலூரிலும் ஆர்த்தி, அவரின் தாய் வீட்டிலும் வசித்து வருகிறார்கள். இந்தநிலையில், நேற்று வழக்கம்போல் பள்ளி முடிந்து பள்ளியை விட்டு வெளியில் வந்த ரட்சிதா, நிதினை ஒரு பெண் மற்றும் ஆண் ஆகியோர் காரில் கூட்டிச் சென்றிருக்கிறார்கள். இதைப் பார்த்த பள்ளி நிர்வாகத்தினர் குழந்தைகளை யாரோ காரில் கடத்திச் செல்வதாக எண்ணியிருக்கிறார்கள்.

இதுகுறித்து உடனடியாக வேலனுக்கும் போலீஸுக்கும் அவர்கள் தகவல் கொடுத்திருக்கிறார்கள். போலீஸார் விசாரணையில் குழந்தைகள் இருவரும் கடத்தப்படவில்லை என்ற உண்மை தெரியவந்திருக்கிறது. குழந்தைகளின் தந்தை அளித்த புகாரின் பேரில் வழக்குப் பதிந்த போலீஸார், குழந்தைகளைத் தனது நண்பர் மூலம் அழைத்துச் சென்றது குழந்தைகளின் தாய் ஆர்த்திதான் என்பதைக் கண்டறிந்தனர். இதையடுத்து குழந்தைகளை மீட்டு தந்தை வேலனிடம் போலீஸார் ஒப்படைத்திருக்கிறார்கள்.