டாஸ்மாக் சரக்கில் கிக் இல்லை என அமைச்சரே சொல்வது வெட்கம்!. பிரேமலதா விளாசல்…

கள்ளக்குறிச்சி மாவட்டம் கர்ணாபுரம் பகுதியில் விஷச்சாராயம் குடித்து மருத்துவனையில் சேர்ந்த 65 பேர் இதுவரை உயிரிழந்திருக்கிறார்கள். போலீசார் இது தொடர்பாக விசாரணை செய்து வருகிறார்கள். இறந்தவர்களுகு 10 லட்சம் நிதியுதவி அளிக்கப்படும் என தமிழக அரசு தெரிவித்திருக்கிறது. ஒருபக்கம், தமிழகம் முழுவதும் கள்ளச்சாரயம் காய்ச்சி விற்பவர்களை பிடிக்கும் முயற்சியில் போலீசார் ஈடுபட்டிருக்கிறார்கள்

கள்ளக்குறிச்சி அருகேயுள்ள கல்வராயன் மலையில்தான் அதிக கள்ளச்சாராயம் காய்ச்சப்படுவதாக செய்திகள் வந்ததால் மலைப்பகுதியிலும் போலீசார் தேடுதல் வேட்டையை துவங்கி இருக்கிறார்கள். சில இடங்களில் பேரல் கணக்கில் சாராயம் பிடிப்பட்டது. அவை கீழே ஊற்றி அழிக்கப்பட்டது.

ஒருபக்கம், இந்த விவகாரத்தை எதிர்கட்சியான அதிமுக கையில் எடுத்திருக்கிறது. கடந்த சில நாட்களாகவே சட்டபையில் அமளியில் ஈடுபட்டு அதிமுக எம்.ல்.ஏக்கள் சஸ்பெண்டும் ஆனார்கள். மேலும், திமுக அரசை பாஜக மற்றும் தேமுதிக போன்ற கட்சிகள் கடுமையாக விமர்சனம் செய்து வருகிறது.

ஒருபக்கம், நேற்று சட்டசபையில் பேசிய திமுக எம்.எல்.ஏவும், நீர்வளத்துறை அமைச்சருமான துரைமுருகன் ‘டாஸ்மாக் சரக்கில் கிக் இல்லை. அதாவது அதிக போதை இல்லை. அதனால்தான் கள்ளச்சாராயத்தை குடிக்கிறார்கள். உழைப்பவர்களுக்கு அசதியை போக்க மது தேவைப்படுகிறது. அரசு விற்கும் மதுபானம் அவர்களுக்கு சாஃப்ட் டிரிங் போல இருக்கிறது. கள்ளச்சாராயத்தை தடுக்க தெருவுக்கு தெரு போலீஸ் ஸ்டேசன் திறக்க முடியாது. கிக் வேண்டும் என்பதற்காகவே சிலர் கள்ளச்சாராயம் குடிக்கிறார்கள்’ என பேசியிருந்தார்.

இந்நிலையில், இதற்கு கடும் கண்டனம் தெரிவித்திருக்கும் தேமுதிக பொதுச்செயலாளர் பிரேமலதா ‘கள்ளச்சாராயம் வந்துவிடக்கூடாது என்பதற்காகத்தான் டாஸ்மாக் திறந்ததாக அரசு சொல்கிறது. ஆனால், கள்ளச்சாராயம் ஒழிந்தபாடில்லை. கள்ளச்சாராயத்தை ஒழிக்க அரசு எந்த நடவடிக்கையும் எடுக்கவில்லை.

ஒட்டுமொத்த மக்களையும் குடிகாரர்களாக மாற்றி இருக்கிறது இந்த அரசு. டாஸ்மாக் மதுபானத்தில் தரம் இல்லை என ஒரு அமைச்சரே ஒத்துக்கொள்கிறார். முழுப்பூசணிக்காயை சோற்றில் மறைக்கிறார்கள். எல்லா இடத்திலும் டாஸ்மாக் திறக்கும் அரசால் எல்லா இடத்திலும் காவல் நிலையங்களை திறக்க முடியாதா? தமிழ்நாடு மோசமான பாதையில் போய் கொண்டிருக்கிறது. தமிழ்நாட்டு மக்கள் எது நல்ல ஆட்சி, யார் நல்ல தலைவர்கள் என்பதை புரிந்துகொள்ள வேண்டும்’ என அவர் பேசினார்.