காத்திருந்த செந்தில் பாலாஜி… 47-வது முறையாகவும் நீட்டிக்கப்பட்ட நீதிமன்ற காவல்…!

செந்தில் பாலாஜி வழக்கில் 47 வது முறையாக நீதிமன்ற காவலை நீட்டித்து நீதிமன்றம் உத்தரவிட்டுள்ளது.

சட்டவிரோதமாக பண பரிமாற்றம் செய்யப்பட்ட வழக்கில் கடந்த ஆண்டு முன்னாள் அமைச்சர் செந்தில் பாலாஜி கைது செய்யப்பட்டார். தற்போது அவர் புழல் சிறையில் அடைக்கப்பட்டிருக்கின்றார். இந்த வழக்கு தொடர்பாக வங்கியின் கணக்கு தொடர்பான ஆவணங்களை கேட்டு அமலாக்கத்துறை வங்கிக்கு அனுப்பிய கடிதத்தை வழங்க வேண்டும் என்று கோரிக்கை வைத்து மனு ஒன்று தாக்கல் செய்யப்பட்டுள்ளது.

இந்த மனுவை ஏற்றுக்கொண்ட சென்னை அமர்வு நீதிமன்ற நீதிபதி இந்த ஆவணங்களை வழங்க அமலாக்கத்துறைக்கு உத்தரவிட்டிருந்தது. ஆவணங்களை பெறுவதற்காக செந்தில் பாலாஜியை இன்று நீதிமன்றத்தில் நேரில் ஆஜர் படுத்தும்படி சிறைத்துறைக்கு உத்தரவிட்டிருந்தார். அதன்படி செந்தில் பாலாஜி முதன்மை அமர்வு நீதிமன்றத்தில் ஆஜர் படுத்தப்பட்டார். அவருக்கு அந்த வங்கி சம்பந்தப்பட்ட அனைத்து ஆவணங்களும் வழங்கப்பட்டது.

இதைத் தொடர்ந்து செந்தில் பாலாஜி தரப்பில் புதிய இரண்டு மனுக்கள் தாக்கல் செய்யப்பட்டுள்ளன. அதில் வங்கி தொடர்பான அசல் ஆவணங்களுக்கும் அமலாக்கத்துறை வழங்கிய ஆவணங்களுக்கும் நிறைய வேறுபாடு இருப்பதாகவும், தங்களுக்கு வழங்கப்பட்ட ஆவணங்களில் கையால் எழுதி திருத்தப்பட்டுள்ளதால் அதன் உண்மை தன்மையை ஆராய வேண்டும் என்று தெரிவித்திருந்தார்.

மேலும் வழக்கில் இருந்து தன்னை விடுவிக்க கோரி தாக்கல் செய்த மனுவில் அனைத்து தரப்பு வாதங்களும் முடிவடைந்த நிலையில் இன்று உத்தரவு பிறப்பிக்க உள்ள நிலையில் வழக்கில் மீண்டும் தங்கள் தரப்பு வாதங்களை முன்வைக்க அனுமதிக்க வேண்டும் என்றும் அந்த மனதில் கோரிக்கை வைக்கப்பட்டிருந்தது. இந்த மனுவை விசாரணை செய்த நீதிபதி இவ்விரு மனுக்களுக்கும் பதிலளிக்கும்படி அமலாக்கத்துறைக்கு உத்தரவிட்டு இந்த வழக்கை 18-ம் தேதிக்கு தள்ளி வைத்து உத்தரவிட்டிருக்கின்றார். இதனால் மீண்டும் 47-வது முறையாக அவர் நீதிமன்ற காவலுக்கு சென்று இருக்கின்றார்.