கன்னடர்களுக்கு 100% வேலைவாய்ப்பு… ட்வீட்டை நீக்கிய சித்தராமையா.. என்ன காரணம்?

தனியார் நிறுவனங்களில் குரூப் சி மற்றும் டி பிரிவில் கன்னடர்களுக்கு 100% இட ஒதுக்கீடு வழங்கும் மசோதா குறித்த பதிவை கர்நாடக முதல்வர் சித்தராமையா நீக்கியிருக்கிறார்.

கர்நாடக முதலமைச்சர் சித்தராமையா, `குரூப் C மற்றும் குரூப் D பணிகளில் கன்னடர்களுக்கு 100% இடஒதுக்கீட்டை கட்டாயமாக்கும் மசோதாவுக்கு அமைச்சரவை ஒப்புதல் அளித்திருக்கிறது’ என பதிவிட்டிருந்தார். கன்னடர்களுக்கே 100% வேலைவாய்ப்பு என்கிற சித்தராமையாவின் அறிவிப்பு சர்ச்சையான நிலையில், அந்தப் பதிவை அவர் நீக்கியிருக்கிறார்.

இதுகுறித்து அம்மாநில தொழிலாளர் நலத்துறை அமைச்சர் சந்தோஷ் லாட், கர்நாடகாவில் உள்ள அனைத்து தனியார் நிறுவனங்களில் 50% நிர்வாக பணிகளிலும், 70% சதவீதம் நிர்வாகம் அல்லாத பணிகளிலும் கன்னடம் தெரிந்த உள்ளூர் நபர்களை கட்டாயம் நியமிக்க வழிவகுக்கும் சட்ட மசோதாவுக்குத்தான் அமைச்சரவை ஒப்புதல் அளித்திருந்ததாக விளக்கம் அளித்திருக்கிறார்.

மேலும், தகுதியான உள்ளூர் நபர்கள் கிடைக்கவில்லை என்றால், சம்பந்தப்பட்ட நிறுவனங்கள், அரசுடன் இணைந்து, உள்ளூர் நபர்களுக்கு 3 ஆண்டுகளுக்குள் பயிற்சி அளிக்க வேண்டும் எனவும் இந்த மசோதா கூறுகிறது. இந்த மசோதாவை நாளை (ஜூலை 18) நடைபெறும் கர்நாடக சட்டப்பேரவை கூட்டத்தொடரிலேயே நிறைவேற்ற அம்மாநில அரசு திட்டமிட்டிருப்பதாகத் தகவல் வெளியாகியிருக்கிறது.