என்ன ஆனாலும் விட மாட்டோம்… கொதிக்கும் மாணவர்கள்.. தகிக்கும் வங்கதேசம்!

வங்கதேசத்தில் மாணவர்களின் போராட்டம் வன்முறையாக மாறியதால், நாடு முழுவதும் மொபைல் இணைய சேவையை அரசு முடக்கியிருக்கிறது.

வங்கதேச விடுதலை வீரர்களின் சந்ததிகளுக்கு 30 விழுக்காடு இடஒதுக்கீடு வழங்கும் முடிவுக்கு எதிர்ப்புத் தெரிவித்து நாடு முழுவதும் மாணவர்கள் போராட்டம் நடத்தி வருகிறார்கள். இந்தப் போராட்டங்கள் பல இடங்களில் வன்முறையாக மாறியதால், பாதுகாப்புக் காரணங்களுக்காக மொபைல் இணைய சேவையை முடக்குவதாக அந்நாட்டு அரசு அறிவித்திருக்கிறது.

தலைநகர் டாக்கா உட்பட பல்வேறு நகரங்களில் வன்முறை வெடித்ததுள்ளன; வன்முறையில் இதுவரை 6 மாணவர்கள் உயிரிழந்திருப்பதாகத் தகவல்கள் வெளியாகியிருக்கின்றன. கடந்த 3 நாட்களாக போராட்டத்தில் ஈடுபட்டுள்ள மாணவர்கள் மீது போலீஸார் மற்றும் ராணுவப் படையினர் தாக்குதல் நடத்தியிருக்கிறார்கள்.

போராட்டக்களமாக வங்கதேசம் தகித்து வரும் நிலையில், போராட்டக்காரர்களைத் தேச துரோகிகள் என்று பொருள்படும் வகையில் அந்நாடு பிரதமர் ஷேக் ஹசீனா, `ரஸாக்கர்கள்’ என்று அடையாளப்படுத்தியது சர்ச்சையை ஏற்படுத்தியிருக்கிறது. இதனால், நாடு முழுவதும் போராட்டத்தைத் தீவிரப்படுத்த இருப்பதாக மாணவர் அமைப்புகள் கொந்தளித்திருக்கின்றன.