இன்ஸ்டா லைவ்; சிறுமிக்குத் தொல்லை… திருப்பூர் இளைஞர் கொலையில் துப்புத்துலங்கியது எப்படி?

திருப்பூர் கணக்கம்பாளையம் பகுதியில் புவனேஸ்வரன் என்கிற இளைஞர் கொல்லப்பட்ட வழக்கில் போலீஸார் துப்புத் துலக்கியுள்ளனர்.

திருச்சி மணப்பாறையைச் சேர்ந்தவர் 26 வயதான புவனேஸ்வரன். திருப்பூர் ஏவிபி லே-அவுட் பகுதியில் தங்கியிருந்து வட்டிக்குப் பணம் கொடுக்கும் தொழிலில் ஈடுபட்டு வந்தார். இவர் சமீபத்தில் நான்கு பேர் கொண்ட கும்பலால் கொடூரமாக வெட்டிக் கொலை செய்யப்பட்டார். இதுகுறித்து வழக்குப் பதிந்த திருப்பூர் போலீஸார், விசாரணையைத் தீவிரப்படுத்தினர்.

சந்தேகத்தின்பேரில், புவனேஸ்வரனுடன் சமீபத்தில் சண்டையிட்ட ஒரு சிறுமியின் தந்தையைப் பிடித்து போலீஸ் விசாரித்தது. இதில், பல்வேறு திடுக்கிடும் தகவல்கள் வெளியாகின. இன்ஸ்டாகிராம் மூலம் இளம் பெண்களுடன் பழகி, அவர்களுடன் வீடியோ காலில் பேசும் வழக்கம் கொண்ட புவனேஸ்வரன், அதை வீடியோவாகவும் போட்டோவாகவும் பதிவு செய்து வைத்துக் கொள்வாராம்.

பின்னர், அந்த போட்டோ, வீடியோவைக் காட்டி இளம்பெண்களிடம் பணம் பறிப்பதை வாடிக்கையாகக் கொண்டிருந்ததாகவும் சொல்லப்படுகிறது. இந்தநிலையில், அப்பகுதியைச் சேர்ந்த 14 வயது சிறுமியுடன் நெருங்கிப் பழகிய புவனேஸ்வரன், அந்த சிறுமியிடமும் வீடியோ காலில் பேசி வந்திருக்கிறார். ஒரு கட்டத்தில் புவனேஸ்வரனின் மிரட்டலை அடுத்து, அவருடன் பழகுவதை சிறுமி நிறுத்தியிருக்கிறார்.

மேலும், தமிழரசன் என்பவருடன் சிறுமி நெருங்கிப் பழகினாராம். இதைக் கண்டு ஆத்திரமடைந்த புவனேஸ்வரன், தமிழரசனை நேரில் சந்தித்து சிறுமியின் வீடியோ, போட்டோக்களைக் காட்டியிருக்கிறார். அதைப்பார்த்து அதிர்ச்சியடைந்த தமிழரசன், இதுகுறித்து சிறுமியின் தந்தையிடம் தெரிவித்திருக்கிறார். இதையடுத்து, புவனேஸ்வரனிடம் அந்த சிறுமியின் தந்தை சண்டை போட்டிருக்கிறார்.

இதையடுத்து, தமிழரசன் மூலம் கூலிப்படையை ஏவி புவனேஸ்வரனை கொலை செய்திருக்கிறார். இந்த விவகாரத்தில் சிறுமியின் தந்தை கைது செய்யப்பட்ட நிலையில், தலைமறைவாக உள்ள தமிழரசன் மற்றும் கூலிப்படையினரை போலீஸார் 3 தனிப்படைகள் அமைத்து தேடி வருகிறார்கள்.