மனுஷங்களா.. குட்டிச்சாத்தானா – கூரையில் விழும் கற்களால் நிம்மதியிழந்த கிராமம்!

திருப்பூர் மாவட்டம் ஒட்டபாளையம் கிராமத்தில் இரவு நேரங்களில் கூரை மீது விழும் கற்களால் அப்பகுதி மக்கள் தூக்கத்தைத் தொலைத்திருக்கிறார்கள்.

திருப்பூர் மாவட்டம் காங்கேயத்தை அடுத்த கணபதிபாளையம் ஊராட்சிக்குட்பட்ட பகுதிதான் ஒட்டபாளையம். இந்த கிராமத்தின் மதுரை வீரன் கோயில் அருகே உள்ள காலனியில் இரவு நேரங்களில் வீடுகளின் மீது கற்கள் திடீரென வந்து விழுவதாகச் சொல்கிறார்கள் அப்பகுதி மக்கள்.

கடந்த 15 நாட்களாக இரவு 7 மணிக்குப் பிறகு இப்படி திடீரென வந்து விழும் கற்களால் பல வீடுகளின் ஓடுகளும் உடைந்து சேதமடைந்திருக்கின்றன. இதுகுறித்து போலீஸில் கிராம மக்கள் புகார் அளிக்கவே போலீஸாரும் ரோந்துப் பணியில் ஈடுபட்டு வருகிறார்கள்.

இதுதவிர ட்ரோன் கேமரா, உள்ளூர் இளைஞர்கள் கிரேன் மீது ஏறி நின்றும் இரவு நேரங்களில் ரோந்துப் பணியில் ஈடுபட்டும், கற்கள் எங்கிருந்து வருகின்றன என்பதைக் கண்டறிய முடியவில்லை. இதனால், கற்களை எறிவது மனிதர்கள்தானா… இல்லை குட்டிச்சாத்தானின் வேலையா என அப்பகுதி மக்கள் பீதியடைந்திருக்கிறார்கள்.

இந்த விவகாரத்தில் அரசு தரப்பில் உரிய நடவடிக்கை எடுக்கவில்லை என்றால் சாலை மறியல் உள்ளிட்ட அடுத்த கட்ட போராட்டங்களில் ஈடுபடப் போவதாக எச்சரிக்கிறார்கள் ஒட்டபாளையம் கிராம மக்கள்.