அசாமில் கொட்டி தீர்த்த மழை!. வெள்ளத்தில் சிக்கி 36 பேர் பலி!.. லட்சக்கணக்கானோர் பாதிப்பு…

இயற்கை பேரிடர்களால் மனிதர்கள் பலியாவது பல வருடங்களாக நடந்து வருகிறது. குறிப்பாக விடாமல் மழை கொட்டித்தீர்த்து அதன் மூலம் வெள்ளம் உருவாகி மக்கள் வசிக்கும் பகுதிகளில் வெள்ளம் ஓடி பலரும் மரணமடையும் சம்பவம் அவ்வப்போது உலகில் நடந்து வருகிறது. உயிர் பலியாவதோடு பலரும் தங்களின் உடமைகளை இழக்கும் துயரமும் நேர்கிறது.

தற்போது இந்த கோரத்தை அசாம் மாநிலம் சந்தித்திருக்கிறது. கடந்த சில நாட்களாகவே அசாம் மாநிலத்தில் கனமழை பெய்து வருகிறது. எனவே, நீர் நிலைகள் நிரம்பி வழிந்தோடி வருகிறது. குறிப்பாக ஆறுகளில் வெள்ளம் பெருக்கெடுத்து ஓடுகிறது. இதனால், ஆற்றங்கரையோர பகுதிகளிலும், தாழ்வான பகுதிகளிலும் வெள்ளம் நிரம்பி இருக்கிறது.

பிரம்மபுத்திரா நதியின் கிளை நதியான கோபிலி நதியில் வெள்ளம் பெருக்கெடுத்து ஓடுகிறது. பல ஆயிரக்கணக்கான ஏக்கர் விவசாய நிலங்கள் நீரில் மூழ்கிவிட்டது. கால்நடை விலங்குகளும் பாதிக்கப்பட்டிருக்கிறது. இதனால், அசாமில் வசிக்கும் மக்கள் சோகத்தில் மூழ்கியுள்ளனர்.

ஒருபக்கம், அசாமில் ஒன்னும் 2 நாட்களுக்கு இடியுடன் கூடிய கனமழை பெய்யும் என வானிலை மையம் அறிவித்திருக்கிறது. 19 மாவட்டங்களில் வசிக்கும் 4 லட்சம் பேர் இதனால் பாதிக்கப்பட்டிருக்கிறார்கள். இந்த மழை, வெள்ளத்தில் சிக்கி இதுவரை 36 பேர் உயிரிழந்துள்ளனர். பாதிக்கப்பட்ட 14 ஆயிரம் பேர் நூற்றுக்கும் மேற்பட்ட நிவாரண முகாம்களில் தங்க வைக்கப்பட்டிருக்கிறார்கள்.