இனி பேட்டரி மாற்ற சிரமம் வேண்டாம்.. ஐபோனில் அறிமுகமாகும் புது வசதி

ஆப்பிள் நிறுவனம் உருவாக்கி வரும் புதிய தொழில்நுட்பம் கொண்டு ஐபோன்களில் பேட்டரியை எளிமையாக மாற்றிவிட முடியும் என்று தகவல் வெளியாகி உள்ளது. ஐபோனின் பேட்டரியை கழற்றும் வழிமுறையை எளிமையாக்கும் வகையில், பேட்டரி கேசிங் டிசைனை மாற்றும் பணிகளில் ஆப்பிள் நிறுவனம் உருவாக்கி வருவதாக கூறப்படுகிறது.

எனினும், இதுகுறித்து ஆப்பிள் சார்பில் இதுவரை எவ்வித தகவலும் வழங்கப்படவில்லை. புதுவித டிசைன் ஐரோப்பிய யூனியனின் விதிமுறைகளை ஏற்கும் வகையில் இருக்கும் என்று தெரிகிறது. ஐரோப்பிய யூனியனின் மாற்றப்பட்ட விதிகளில் மின்சாதனங்களின் பேட்டரியை கழற்றும் வழிமுறை எளிமையாக்குவதை வலியுறுத்துகிறது.

அதன்படி ஏற்கனவே உள்ள ஸ்டிரிப் ரக பேட்டரி முறையை நீக்கிவிட்டு, அதற்கு மாற்றாக மின்-அதிர்வு மூலம் பேட்டரியை கழற்றும் வழிமுறை கொண்டுவரப்பட இருப்பதாக தகவல் வெளியாகி உள்ளது.

தற்போதுள்ள ஐபோன் மாடல்களில் பேட்டரி ஃபாயில் மூலம் சுற்றப்பட்டுள்ளது. இது ஸ்டிரிப்கள் மூலம் ஐபோனின் மெயின் போர்டில் பொருத்தப்பட்டு இருக்கும். இதில் இருந்து பேட்டரியை கழற்றுவது அவ்வளவு எளிமையான நடைமுறை இல்லை.

புதிய தகவல்களின் படி ஆப்பிள் நிறுவனம் எதிர்கால ஐபோன் மாடல்களின் பேட்டரியை ஃபாயிலுக்கு பதிலாக மெட்டல் மூலம் என்கேஸ் செய்யும் என்றும் இதன் மூலம் பேட்டரியை எளிதில் கழற்ற முடியும் என்றும் கூறப்படுகிறது. இந்த வழிமுறை எளிமையாக இருக்கும் என்றாலும், ஆப்பிள் நிறுவனம் தனது பயனர்களிடம் அவர்களது ஐபோனை அவர்களாகவே சரிபார்ப்பதை அறிவுறுத்துவதில்லை.

தற்போதைய தகவல்கள் ஆப்பிள் நிறுவனம் ஐபோன் 16 சீரிஸ் மாடல்களில் இத்தகைய பேட்டரியை வழங்குமா என்ற எதிர்பார்ப்பை ஏற்படுத்தி இருக்கின்றன. முன்னதாக இணையத்தில் லீக் ஆன ஐபோன் 16 ப்ரோ பேட்டரியில் மெட்டல் ஷெல் பயன்படுத்தப்பட்டு இருந்தது குறிப்பிடத்தக்கது.