பொசுக்குனு அறிவித்த போக்கோ.. முதல் Tab எப்போ வெளியாகுது தெரியுமா?

போக்கோ நிறுவனம் இந்திய சந்தையில் தனது முதல் டேப்லெட் மாடலை அறிமுகம் செய்ய இருக்கிறது. புது டீசர் வெளியிட்டு இந்த தகவலை அந்நிறுவனம் உறுதிப்படுத்தி இருக்கிறது. மேலும், புதிய டேப்லெட் மாடலின் டிசைன் மற்றும் டிஸ்ப்ளே விவரங்களையும் போக்கோ நிறுவனம் போனஸாக அறிவித்துள்ளது.

சமீபத்தில் போக்கோ பேட் மாடல் சர்வதேச சந்தையில் அறிமுகம் செய்யப்பட்டது. இதைத் தொடர்ந்து இந்த மாடல் தற்போது இந்தியாவிலும் அறிமுகமாக இருக்கிறது. அம்சங்களை பொருத்தவரை இந்திய வெர்ஷனிலும், சர்வதேச மாடலில் வழங்கப்பட்ட அம்சங்களே வழங்கப்படும் என்று தெரிகிறது.

2024 மே மாதம் சர்வதேச சந்தையில் அறிமுகம் செய்யப்பட்ட போக்கோ பேட் மாடல் ஸ்னாப்டிராகன் 7s ஜென் 2 பிராசஸர், 10,000mAh பேட்டரி கொண்டிருந்தது. மேலும், இது வைபை வசதி மட்டும் கொண்டிருந்தது குறிப்பிடத்தக்கது.

தற்போது போக்கோ இந்தியா வெளியிட்டுள்ள டீசர்களின் படி போக்கோ பேட் மாடல் இந்தியாவில் ஆகஸ்ட் 23 ஆம் தேதி வெளியிடப்படும் என்று குறிப்பிடப்பட்டு இருக்கிறது. இந்த மாடலுடன் கீபோர்டு மற்றும் ஸ்டைலஸ் அறிமுகமாகிறது. இத்துடன் புதிய டேப்லெட் கீழ்புறத்தில் ஸ்பீக்கர் கிரில், யுஎஸ்பி சி போர்ட், 3.5mm ஆடியோ ஜாக் உள்ளது.

ப்ளிப்கார்ட் தளத்தில் உள்ள மைக்ரோசைட் விவரங்களின் படி போக்கோ பேட் மாடலில் 12.1 இன்ச் டிஸ்ப்ளே, 120Hz அடாப்டிவ் ரிப்ரெஷ் ரேட், Tuv ரெயின்லாந்து சான்று கொண்டிருக்கும் என்று குறிப்பிடப்பட்டு இருக்கிறது. இவை தவிர புதிய டேப்லெட் பற்றி வேறு எந்த தகவலும் இடம்பெறவில்லை.

சர்வதேச சந்தையில் கிடைக்கும் போக்கோ பேட் மாடல் பின்புறம் மற்றும் முன்புறத்தில் 8MP கேமரா சென்சார் கொண்டிருக்கிறது. இத்துடன் டால்பி அட்மோஸ் வசதி கொண்ட நான்கு ஸ்பீக்கர்கள், 10,000mAh பேட்டரி, 33W சார்ஜிங் வழங்கப்படுகிறது. இத்துடன் வைபை 6 மற்றும் ப்ளூடூத் 5.2 கனெக்டிவிட்டி வழங்கப்பட்டுள்ளது.