அதிவேக பணப்பரிமாற்றம் செய்யலாம்.. ரேசர்பே டர்போ யு.பி.ஐ. அறிமுகம்!

ரேசர்பே நிறுவனம் முற்றிலும் புதிய மற்றும் அதிவேக யு.பி.ஐ. சிஸ்டத்தை அறிவித்து இருக்கிறது. டர்போ யு.பி.ஐ. என்று அழைக்கப்படும் புதிய யு.பி.ஐ. சிஸ்டம் 1-ஸ்டெப் பேமண்ட் சேவையை வழங்குகிறது. இது வழக்கமான யு.பி.ஐ. முறைகளை விட ஐந்து மடங்கு வரை அதிவேகமானது ஆகும்.

இந்த சேவையை வழங்குவதற்காக ரேசர்பே நிறுவனம் தேசிய பேமண்ட் கார்ப்பரேஷன் ஆஃப் இந்தியா மற்றும் ஆக்சிஸ் வங்கியுடன் கூட்டணி அமைத்து இருக்கிறது. புதிய பேமண்ட் சிஸ்டம் யு.பி.ஐ. பேமண்ட்களை அதிவேகமாகவும், எளிமையாகவும் மேற்கொள்ள வழி செய்கிறது.

ரேசர்பே டர்போ யு.பி.ஐ.

புதிய ரேசர்பே டர்போ யு.பி.ஐ. சேவை ஆன்லைன் வர்த்தகர்களுக்கு பணம் அனுப்பும் போது மூன்றாம் தரப்பு யு.பி.ஐ. செயலியை பயன்படுத்த வேண்டிய அவசியத்தை நீக்கி இருக்கிறது. இவ்வாறான அதிவேக வழிமுறை யு.பி.ஐ. பேமண்ட்களின் வெற்றி விகிதத்தை பத்து சதவீதம் வரை அதிகரித்துள்ளது. இத்துடன் டர்போ யு.பி.ஐ. மூலம் வர்த்தகம் செய்வோர், ஒட்டுமொத்த பேமண்ட் அனுபவத்தை முழுமையாக கட்டுப்படுத்த உதவுகிறது.

டர்போ யு.பி.ஐ. சேவையை மேம்படுத்துவதற்காக ரேசர்பே நிறுவனம் பல்வேறு முன்னணி பிராண்டுகளுடன் கூட்டணி அமைத்து இருக்கிறது. அதன்படி டாடா ஸ்டார்குயிக், இக்சிகோ, எஃப்.என்.பி., டிரெயின்மேன் மற்றும் தான் உள்ளிட்ட பிராண்டுகளுடன் ரேசர்பே கூட்டணி அமைத்துள்ளது.

ரேசர்பே டர்போ யு.பி.ஐ. எவ்வாறு வேலை செய்கிறது?

தற்போதைய யு.பி.ஐ. பேமண்ட் முறைகளில், முதற்கட்டமாக பேமண்ட் வழிமுறையை தேர்வு செய்து அதன்பின் யு.பி.ஐ. முகவரியை பதிவிட வேண்டும்.

இதன் பிறகு, பேமண்ட் முறை உங்களது யு.பி.ஐ. பேமண்ட் ஆப் அல்லது வலைதளத்திற்கு மாற்றப்படும். இதைத் தொடர்ந்து யு.பி.ஐ. பின் நம்பரை பதிவிட்டு, பேமண்ட்-ஐ நிறைவு செய்யலாம்.

டர்போ யு.பி.ஐ. மூலம் ஐந்து வழிமுறைகள் அப்படியே குறைந்து ஒரேயொரு வழிமுறையாக மாறி இருக்கிறது.

இந்த அம்சத்தை பயன்படுத்த பேமண்ட் மோட்களில் டர்போ யு.பி.ஐ. ஆப்ஷனை தேர்வு செய்ய வேண்டும். அடுத்து யு.பி.ஐ. பின் நம்பர் பதிவிட்டால், பேமண்ட் நிறைவு செய்யப்பட்டு விடும்.

முதற்கட்டமாக உங்களது வங்கி கணக்கை யு.பி.ஐ. அக்கவுண்ட் உடன் இணைப்பது அவசியம் ஆகும்.

ரேசர்பே டர்போ யு.பி.ஐ. சிஸ்டம் கடந்த வாரம் அறிமுகம் செய்யப்பட்ட பே.டி.எம். யு.பி.ஐ. எஸ்.டி.கே. போன்ற சேவை ஆகும். இந்த அம்சமும் பயனர்களை நேரடியாக யு.பி.ஐ. பேமண்ட் செய்ய உதவுகிறது. ரேசர்பே டர்போ யு.பி.ஐ. போன்றே பே.டி.எம். யு.பி.ஐ. எஸ்.டி.கே. அம்சம் கொண்டு யு.பி.ஐ. பின் நம்பர் மட்டும் பதிவிட்டு அதிவேகமாக பணம் அனுப்பிவிட முடியும்.