கேம் வடிவில் தயாரான விராட் கோலி – கவுதம் கம்பீர் மோதல்!

ஐபிஎல் 2023 கிரிகெட் தொடர் சமூக வலைதளங்களில் பெரும் பேசுபொருளாக இருந்து வருகிறது. ஐபிஎல் தொடர்பின் விறுவிறுப்பான போட்டிகள் மட்டுமின்றி, போட்டிகளின் போது ஏற்படும் சம்பவங்களும் உடனே வைரல் ஆகி விடுகிறது. அந்த வகையில், கடந்த வாரம் நடைபெற்ற ஐபிஎல் போட்டியின் போது விராட் கோலி மற்றும் கவுதம் கம்பீர் இடையே வாக்குவாதம் ஏற்பட்டது. இந்த விவகாரம் இருவரும் சண்டையிட்டதாக சமூக வலைதளங்களில் வைரல் ஆனது.

ராயல் சேலஞ்சர்ஸ் பெங்களூரு மற்றும் லக்னோ சூப்பர் ஜெயண்ட்ஸ் அணிகள் இடையேயான ஐபிஎல் போட்டியின் போது நடைபெற்றது. விராட் கோலி மற்றும் கவுதம் கம்பீரின் வாக்குவாதம் ஐபிஎல் ரசிகர்கள் மட்டுமின்றி அனைவர் மத்தியிலும் கவனத்தை ஈர்த்தது. வைரல் சம்பவம் 2டி கிராஃபிக்ஸ் நுட்பத்தில் கேமாக உருவாக்கப்பட்டு இருக்கிறது. யுனிடி கேம் எஞ்சின் மூலம் உருவாக்கப்பட்ட கேம் கிட்ஹப் தளத்தில் பதிவேற்றம் செய்யப்பட்டுள்ளது.

இதனை டெஸ்க்டாப் மற்றும் மொபைலில் விளையாட முடியும். எனினும், மொபைலில் விளையாடும் போது லோடு ஆக அதிக நேரம் எடுத்துக் கொண்டு, பின் கிராஷ் ஆகிறது. இதனால் கேம் விளையாட விரும்புவோர் அதனை வலைதளத்தில் விளையாடலாம்.

விராட் கோலி – கவுதம் கம்பீர் கேம் விளையாடுவது எப்படி?

வலைதளம் சென்றதும், கேம் துவங்கிவிடும். பின் விராட் கோலி அல்லது கவுதம் கம்பீர் என்று இருவரில் ஒருவரை தேர்வு செய்து கொள்ள வேண்டும். இவ்வாறு செய்து முடித்ததும், கிரிகெட் மைதானத்தில் விராட் கோலிக்கு எதிராக கவுதம் கம்பீர் அல்லது கவுதம் கம்பீருக்கு எதிராக விராட் கோலி இருப்பது போன்ற காட்சிகள் திரையில் ஓடும். விராட் கோலி மற்றும் கவுதம் கம்பீர் அவரவர் அணி சீருடையில் மோதும் காட்சிகள் தொடர்கின்றன.

இருவரது மோதலின் பின்னணியில் இரு அணி வீரர்களும் பயிற்சி செய்யும் காட்சிகளும் உள்ளன. இந்த கேம் முழுக்க முழுக்க இரு ஐபிஎல் அணிகள் ஒருவரை ஒருவர் தாக்கிக் கொள்ளும் வகையில் உருவாக்கப்பட்டு இருக்கிறது. கேம் முடிவில் பயனர் தேர்வு செய்யும் அணியின் வீரர் வெற்றியாளராக நிற்பார். அந்த வகையில் விராட் கோலியை தேர்வு செய்தால் கவுதம் கம்பீர் வீழ்த்தப்பட்டு இருப்பார்.

இந்த கேம் முழுக்க முழுக்க பொழுதுபோக்கு அடிப்படையிலேயே உருவாக்கப்பட்டு இருக்கிறது. இந்த கேம் உண்மை சம்பவத்தை தழுவி நகைச்சுவையாக உருவாக்கப்பட்டுள்ளது.