கண்ணாடியைத் திருப்புனா எப்படி ஆட்டோ ஓடும் – மக்களை திசைதிருப்ப தேசிய கீதத்தை மாற்றிய நாடு!

நைஜீரியாவில் வரலாறு காணாத அளவுக்கு பணவீக்கம் ஏற்பட்டு விலைவாசி உயர்வால் மக்கள் அவதிப்பட்டு வரும் நிலையில், அவர்களின் கவனத்தைத் திசைதிருப்ப நாட்டின் தேசிய கீதத்தை மாற்றும் சட்டத்தை நிறைவேற்றியிருக்கிறார்கள்.

ஆப்பிரிக்க நாடான நைஜீரியாவில் அதிபர் போலா தினுபு தலைமையிலான ஆட்சி நடைபெற்று வருகிறது. இவர் தலைமையிலான ஆட்சி ஓராண்டை நிறைவு செய்திருக்கும் நிலையில், நாட்டின் பணவீக்கம் 28 ஆண்டுகளில் இல்லாத அளவாக 33.20% ஆக உயர்ந்திருக்கிறது.

இதனால், அத்தியாவசியப் பொருட்களின் விலையும் கடுமையாக உயர்ந்திருக்கிறது. அரசின் மெத்தனப்போக்கே இந்த நிலைக்குக் காரணம் என நாட்டின் பல பகுதிகளிலும் அரசுக்கு எதிரான போராட்டங்கள் அதிகரித்து வருகின்றன. இந்தநிலையில், மக்களை திசைதிருப்பும் நடவடிக்கையாக போலா தினுபு தலைமையிலான அரசு, தேசிய கீதத்தை மாற்றும் சட்ட மசோதாவை நாடாளுமன்றத்தில் அறிமுகப்படுத்தி நிறைவேற்றியிருக்கிறது.

சுதந்திரமடைந்த காலம் முதலே நைஜீரியாவின் தேசிய கீதமாக இருந்த `Arise O’ Compatriots’ பாடலுக்குப் பதில் இனிமேல், `We Hail Thee’ பாடல் தேசிய கீதமாகத் தொடரும் என்று அறிவிக்கப்பட்டிருக்கிறது. இது நைஜீரியாவில் மிகப்பெரிய சர்ச்சையை ஏற்படுத்தியிருக்கிறது.