ஜெர்மனியுடன் கை கோர்த்த இந்தியா.. தொழில்நுட்பம் முதல் விசா வரை.. மோடி வெளியிட்ட மாஸ் அப்டேட்!

இந்தியா மற்றும் ஜெர்மனி இடையிலான 75 ஆண்டு கால ராஜதந்திர உறவுகளில் ஒரு மாபெரும் மைல்கல்லாக, இந்தியக் குடிமக்களுக்கு ஜெர்மனி செல்வதற்கு ‘விசா இல்லா பயண வசதியை’ (Visa-Free Transit) ஜெர்மன் அதிபர் (Chancellor) பிரெட்ரிக் மெர்ஸ் அதிகாரப்பூர்வமாக அறிவித்துள்ளார். குஜராத்தின் அகமதாபாத்தில் நடைபெற்ற இருதரப்பு பேச்சுவார்த்தைக்குப் பின் இந்த அதிரடி அறிவிப்பு வெளியானது.

மோடி – மெர்ஸ் சந்திப்பு:
இரண்டு நாள் அரசுமுறைப் பயணமாக இன்று இந்தியா வந்துள்ள ஜெர்மன் அதிபர் பிரெட்ரிக் மெர்ஸை, பிரதமர் நரேந்திர மோடி அகமதாபாத்தில் உற்சாகமாக வரவேற்றார். இருவரும் சபர்மதி ஆசிரமத்திற்குச் சென்றதுடன், அங்கு நடைபெற்று வரும் சர்வதேசப் பட்டம் திருவிழாவிலும் (Kite Festival) பங்கேற்றனர். இதனைத் தொடர்ந்து காந்திநகரில் உள்ள மகாத்மா மந்திரில் உயர்மட்டப் பேச்சுவார்த்தை நடைபெற்றது.

விசா இல்லா வசதி:
இந்தியக் குடிமக்கள் ஜெர்மனி வழியாக சர்வதேசப் பயணம் மேற்கொள்ளும்போது இனி ‘விமான நிலைய ட்ரான்சிட் விசா’ (Airport Transit Visa) தேவையில்லை. இது இந்தியர்களுக்கு ஜெர்மனி வழங்கியுள்ள மிகப்பெரிய அங்கீகாரமாகக் கருதப்படுகிறது.

தொழில்நுட்ப ஒத்துழைப்பு:
பசுமை ஹைட்ரஜன் (Green Hydrogen), செயற்கை நுண்ணறிவு (AI) மற்றும் செமிகண்டக்டர் துறையில் இரு நாடுகளும் இணைந்து செயல்படப் புரிந்துணர்வு ஒப்பந்தங்கள் (MoUs) கையெழுத்தாகின.

கல்வி மற்றும் வேலைவாய்ப்பு:
இந்திய மாணவர்கள் மற்றும் செவிலியர்கள் ஜெர்மனியில் பணிபுரியும் நடைமுறைகளை எளிதாக்க ‘குளோபல் ஸ்கில் பார்ட்னர்ஷிப்’ (Global Skills Partnership) திட்டம் தொடங்கப்பட்டுள்ளது. மேலும், ஜெர்மன் பல்கலைக்கழகங்கள் இந்தியாவில் தங்கள் கிளைகளைத் தொடங்க பிரதமர் மோடி அழைப்பு விடுத்துள்ளார்.

வலுவடையும் பாதுகாப்புத் துறை:
அமெரிக்கா மற்றும் ரஷ்யா போன்ற நாடுகளைச் சார்ந்திருப்பதைக் குறைக்க, ஜெர்மனியுடன் இணைந்து நீர்மூழ்கிக் கப்பல்கள் மற்றும் நவீன ராணுவத் தளவாடங்களைத் தயாரிக்க இந்தியா முடிவு செய்துள்ளது. பாதுகாப்புத் துறை வர்த்தக நடைமுறைகளை ஜெர்மனி எளிமைப்படுத்தியதற்காக பிரதமர் மோடி தனது நன்றியைத் தெரிவித்தார்.

பிரதமர் மோடி பேசியது:
“இந்தியா – ஜெர்மனி இடையிலான வர்த்தகம் 50 பில்லியன் டாலரைத் தாண்டியுள்ளது. இது வெறும் வர்த்தக உறவு மட்டுமல்ல, 21-ஆம் நூற்றாண்டின் உலகளாவிய சவால்களை எதிர்கொள்ளும் ஒரு ‘எல்லைகளற்ற கூட்டணி’.

ஜெர்மன் அதிபரின் இந்தப் பயணம் மற்றும் விசா தொடர்பான அறிவிப்பு, வெளிநாடு செல்ல விரும்பும் இந்திய இளைஞர்கள் மற்றும் தொழில்முனைவோர் மத்தியில் பெரும் மகிழ்ச்சியை ஏற்படுத்தியுள்ளது. நாளை அதிபர் மெர்ஸ் பெங்களூருவில் உள்ள ‘போஷ்’ (Bosch) நிறுவனத்திற்குச் சென்று தனது பயணத்தை நிறைவு செய்கிறார்.