தமிழகத்தில் சட்டமன்றத் தேர்தல் களம் தற்போதே சூடுபிடிக்க தொடங்கிவிட்ட நிலையில், ஆளும் திமுக மற்றும் பிரதான எதிர்க்கட்சியான அதிமுக ஆகிய இரு துருவங்களும் தங்களது தேர்தல் வியூகங்களை வகுப்பதில் தீவிரமாக உள்ளன. தொகுதி பங்கீடு விவகாரத்தில் முதலமைச்சர் ஸ்டாலின் மற்றும் எடப்பாடி பழனிசாமி ஆகிய இருவரில் யார் சிறப்பாக செயல்படுகிறார்கள் என்ற விவாதம் ஊடகங்களில் அலசப்பட்டு வருகிறது.
திமுக கூட்டணியை பொறுத்தவரை, தேமுதிகவிற்கு 10 சட்டமன்ற இடங்கள் மற்றும் ஒரு ராஜ்யசபா சீட் வழங்கப்பட்டிருப்பது அரசியல் வட்டாரத்தில் ஒரு பெரிய அதிர்ச்சியை ஏற்படுத்தியுள்ளது. ஆரம்பத்தில் ஸ்டாலின் தனது வியூகத்தில் முந்துவது போல் தெரிந்தாலும், நீண்ட கால விசுவாசமான கட்சிகளை விட புதிதாக வந்தவர்களுக்கு அதிக முக்கியத்துவம் அளிப்பது போன்ற ஒரு தோற்றத்தை இது உருவாக்கியுள்ளது. தேமுதிகவுக்கு 10 சீட் என்பது திமுக கூட்டணிக் கட்சிகளிடையே ஒருவிதமான கசப்பை ஏற்படுத்த வாய்ப்புள்ளது. விசுவாசமாக இருந்தவர்களுக்கு குறைவான இடங்களை கொடுத்துவிட்டு, நேற்று வந்த தேமுதிகவிற்கு அதிக இடங்களை ஒதுக்கியதை நடுநிலையாளர்கள் விமர்சித்து வருகின்றனர்.
ஆனால் எடப்பாடி பழனிசாமி கச்சிதமாக பாஜக, பாமக, அமமுக என மூன்று கட்சிகளை மட்டும் கூட்டணியில் சேர்த்து, அவர்களுக்கும் தொகுதி உடன்பாட்டில் திருப்தி செய்ய வைத்து தான் நினைத்ததையும் சாதித்து கொண்டார். 70 கேட்ட பாஜகவை 27க்குள் அடக்கியது, 25 கேட்ட பாமகவை 18 என முடிவு செய்தது, 20 கேட்ட அமமுகவை 11க்குள் சுருக்கியது எடப்பாடியாரின் ராஜதந்திரத்திற்கு ஒரு எடுத்துக்காட்டு ஆகும்.
அதேபோல் தேர்தல் பிரச்சாரத்தை பொறுத்தவரை, எடப்பாடி பழனிசாமி மிகவும் வேகமாகவும் ஆக்ரோஷமாகவும் தனது பயணத்தை தொடங்கியுள்ளார். ஆனால், , திமுக தனது பயணத் திட்டங்களை இன்னும் முழுமையாக வெளியிடவில்லை. வரும் நாட்களில் தேர்தல் களம் சூடுபிடிக்கும்போதுதான் இரு தரப்பு வியூகங்களின் நிஜமான பலம் தெரியும். தற்போதைய நிலையில் திமுகவிற்கு சாதகமான அம்சங்கள் பல இருந்தாலும், தொகுதி பங்கீட்டில் தேமுதிகவிற்கு அளிக்கப்பட்ட முக்கியத்துவம் ஒரு பெரிய சறுக்கலாகவே அரசியல் விமர்சகர்களால் கருதப்படுகிறது.
இறுதியாக, இந்தத் தேர்தல் என்பது வெறும் ஆட்சி மாற்றத்திற்கான போராட்டம் மட்டுமல்ல, இது ஒரு சித்தாந்தப் போராகவும் பார்க்கப்படுகிறது. வலதுசாரி சக்திகளுக்கு எதிரான யுத்தம் என்று திமுக கூட்டணி தீவிரமாகப் பிரச்சாரம் செய்யும் நிலையில், அதிமுக தனது மக்கள் நலத் திட்டங்களை முன்வைத்து மக்களை அணுகுகிறது. இந்த அரசியல் சதுரங்க வேட்டையில் யாருடைய ராஜதந்திரம் வெல்ல போகிறது என்பது வாக்காளர்களின் கைகளில்தான் உள்ளது.