டி20 உலகக் கோப்பை வென்ற இந்திய அணிக்கு ரூ. 125 கோடி.. பி.சி.சி.ஐ. அதிரடி

2024 டி20 உலகக் கோப்பை தொடரில் வெற்றி பெற்ற இந்திய அணிக்கு முன்னாள் வீரர்கள், ரசிகர்கள், அரசியல் தலைவர்கள் என பலத்தரப்பினரும் தங்களது வாழ்த்துக்களை தெரிவித்து வருகின்றனர். டி20 உலகக் கோப்பை வென்ற இந்திய அணிக்கு சர்வதேச கிரிக்கெட் கவுன்சில் (ஐசிசி) சார்பில் 2.45 மில்லியன் டாலர்கள் இந்திய மதிப்பில் ரூ. 20 கோடியே 42 லட்சம் பரிசுத் தொகையாக வழங்கப்பட்டது.

ஐ.சி.சி. தவிர டி20 உலகக் கோப்பை வென்ற இந்திய அணிக்கு இந்திய கிரிக்கெட் கட்டுப்பாட்டு வாரியமான பி.சி.சி.ஐ. சார்பில் தனியே பரிசுத் தொகை அறிவிக்கப்பட்டு இருக்கிறது. இந்திய அணிக்கு பி.சி.சி.ஐ. வழங்கும் பரிசுத் தொகை சார்ந்த அறிவிப்பை பிசிசிஐ செயலாளர் ஜெய் ஷா வெளியிட்டுள்ளார்.

இது குறித்து அவர் வெளியிட்ட எக்ஸ் தள பதிவில், “ஐ.சி.சி. ஆடவர் T20 உலகக் கோப்பை 2024-ஐ வென்றதற்காக இந்திய அணிக்கு ரூ. 125 கோடி பரிசுத் தொகையை அறிவிப்பதில் மகிழ்ச்சி அடைகிறேன். போட்டி முழுவதும் இந்த அணி சிறப்பான திறமை, உறுதிப்பாடு மற்றும் விளையாட்டுத்திறனை வெளிப்படுத்தியுள்ளது. இந்த சிறந்த சாதனைக்காக அனைத்து வீரர்கள், பயிற்சியாளர்கள் மற்றும் துணை ஊழியர்களுக்கு வாழ்த்துக்கள்!,” என்று குறிப்பிட்டுள்ளார்.

நடந்து முடிந்த டி20 உலகக் கோப்பை தொடரில் இரண்டாவது இடம்பிடித்த தென் ஆப்பிரிக்கா அணிக்கு ஐ.சி.சி. சார்பில் 1.28 மில்லியன் டாலர்கள், இந்திய மதிப்பில் ரூ. 10 கோடியே 67 லட்சம் பரிசுத் தொகையாக வழங்கப்பட்டது குறிப்பிடத்தக்கது.