என் ஃப்ரண்டை போல யாரு மச்சான்… யானைகளின் விநோத செல்லப்பெயர் பழக்கம்!

ஆப்பிரிக்க யானைகள் தங்கள் கூட்டத்தில் இருக்கும் ஒவ்வொரு யானைகளையும் செல்லப் பெயரிட்டு தனித்த ஓசையோடு அழைக்கும் வழக்கம் கொண்டவையாக இருக்கின்றன என்பது ஆய்வில் தெரியவந்திருக்கிறது.

அமெரிக்காவின் கொலராடோ பல்கலைக்கழக ஆய்வாளர்கள் கென்யாவின் சாம்ப்ரூ தேசிய பூங்காவில் 1986 – 2022 வரையில் நடத்தப்பட்ட ஆய்வில் யானைகளின் இந்த வழக்கம் பற்றி முதல்முறையாக வெளியுலகுக்குத் தெரியவந்திருக்கிறது. டால்பின்கள் மற்றும் கிளிகள் ஆகியவை தங்களுக்கு நெருக்கமானவற்றை அழைக்க, அவற்றின் விநோத ஓசைகளைப் பயன்படுத்துவது ஏற்கனவே ஆய்வில் கண்டறியப்பட்டிருக்கிறது.

ஆனால், யானைகளைப் பொறுத்தவரை மனிதர்கள் தங்கள் நண்பர்களுக்கு செல்லப்பெயரிட்டு அழைப்பது போன்று தனித்தனி ஓசைகள் மூலம் தங்களுக்கு நெருக்கமான யானையை அழைப்பதாகத் தெரிய வந்திருக்கிறது. மனிதரல்லாத ஒரு விலங்கு இவ்வாறான ஓசைகள் வாயிலாக குறிப்புகளைக் கடத்துவது இதுவே முதல்முறை என்கிறார்கள் ஆய்வாளர்கள்.

இதுகுறித்து பேசிய ஆய்வாளர் மைக்கேல் பார்டோ, `கென்யா தேசிய பூங்காவில் இருக்கும் இரண்டு யானைக் கூட்டங்கள் எழுப்பிய ஒலிகளை செயற்கை நுண்ணறிவு அல்காரிதம் கொண்டு ஆய்வு செய்ததில் இந்த முடிவு கிடைத்திருக்கிறது. ஒவ்வொரு யானையும் தங்களின் நெருக்கமான யானைகளை அழைக்க பிரத்யேக ஓசைகளை எழுப்புகின்றன.

அத்தோடு, அழைப்பைப் பெறும் யானைகள் அதற்கான பதிலையும் ஓசைகளின் வழியே கடத்துவதோடு, அந்த ஓசைகளை மற்ற யானைகள் சரியாக அடையாளம் கண்டுகொள்வதும் தெரிய வந்திருக்கிறது’ என்றார். இந்த ஆய்வில், யானைகளின் 469 விதமான பிரத்யேக ஒலிகள் அடையாளம் காணப்பட்டிருக்கின்றன. இதில், 111 யானைகள், தங்கள் நெருக்கமான யானைகளுக்கு அழைப்பு விடுத்ததையும், 117 யானைகள் அதற்கான பதில் ஒலி எழுப்பியதையும் ஆய்வாளர்கள் தனிமைப்படுத்தியிருக்கிறார்கள்.

இதையும் படிங்க: ஐபிஎல்லில் அதிக பிராண்ட் வேல்யூ – முதலிடத்தில் இருக்கும் சிஎஸ்கேவின் மதிப்பு தெரியுமா?