உச்சத்தில் இஞ்சி, தக்காளி விலை… தங்க நகை கூட பரவாயில்லை போலயே… இன்றைய மார்க்கெட் நிலவரம்…

கோயம்பேடு மொத்த விலை காய்கறி மார்க்கெட்டில் இன்று பூண்டு, முருங்கைக்காய், பாகற்காய், பீன்ஸ் போன்ற காய்கறிகளின் விலை குறைந்துள்ளது. அதே நேரத்தில், பீட்ரூட் மற்றும் இஞ்சியின் விலை அதிகரித்து காணப்பட்டது.

மார்க்கெட்டில் விற்பனை செய்யும் வியாபாரிகள் கூறுகையில், ஜூன்7ல் ஒரு கிலோ பூண்டு 350 ரூபாயிற்கு விற்கப்பட்டு வந்தது. அடுத்ததாக, ஜூன் 14 முதல் நேற்று வரை கிலோ 320 ரூபாய்க்கு விற்கப்பட்ட பூண்டு இன்று ஒரு கிலோ ரூ.20 குறைந்து ரூ.300 ஆக உள்ளது.

அதுமட்டுமல்லாமல், ஜூன் 16ம் தேதி முதல் 19 தேதி வரை ஒரு கிலோ முருங்கைக்காய் விலை ரூபாய் 90ல் இருந்து 150 ரூபாயிற்கு உயர்ந்து இருக்கிறது. நேற்று 190 ரூபாயாக இருந்த விலை இன்று 10 ரூ குறைந்து 180 ரூபாயாக விற்கப்பட்டு வருகிறது.

வெளியூர் மற்றும் வெளிமாநிலங்களில் இருந்து வரும் காய்கறிகளின் வரத்து குறைந்து இருக்கிறது. அதேநேரத்தில், முகூர்த்த நாட்களும் தொடர்ந்து வந்து கொண்டு இருப்பதால் காய்கறி தேவை அதிகமாகி விலையும் எக்கசக்கமாக உயர்ந்து இருப்பதாக கூறப்படுகிறது. கடந்த வருடம் தசமடித்த தக்காளி விலை மீண்டும் உச்சம் அடைந்து 70 ரூபாயிற்கு விற்கப்பட்டு வருவது மக்களை அதிர்ச்சி அடைய வைத்துள்ளது.