களைகட்டும் விக்கிரவாண்டி தேர்தல் களம்… இறுதி வேட்பாளர் பட்டியல் இன்று வெளியீடு!

விக்கிரவாண்டி இடைத்தேர்தலில் வேட்புமனுக்களை வாபஸ் பெற இன்றே கடைசி நாளாகும். இன்று மாலை வெளியாகிறது இறுதி வேட்பாளர் பட்டியல்.

விக்கிரவாண்டி தொகுதி திமுக எம்.எல்.ஏ புகழேந்தி , கடந்த ஏப்ரல் 6-ம் தேதி மறைந்ததை அடுத்து, ஏப்ரல் 8-ம் தேதி அந்தத் தொகுதி காலியானதாக அறிவிக்கப்பட்டது. மக்களவைத் தேர்தல் முடிந்த நிலையில், விக்கிரவாண்டி தொகுதிக்கான இடைத்தேர்தல் ஜூலை 10-ம் தேதி நடைபெறும் என தேர்தல் ஆணையம் அறிவித்தது.

விக்கிரவாண்டி இடைத்தேர்தலுக்கான வேட்புமனுத் தாக்கல் கடந்த 14-ம் தேதி தொடங்கி 21-ம் தேதி முடிவடைந்தது. திமுக, பாமக, நாம் தமிழர் கட்சி, சுயேச்சைகள் என 64 பேர் வேட்புமனுத் தாக்கல் செய்திருந்தனர். வேட்புமனுக்கள் மீதான பரிசீலனையில் பல்வேறு காரணங்களால் 35 பேரின் வேட்புமனுக்கள் நிராகரிக்கப்பட்டன.

29 பேரின் வேட்புமனுக்கள் ஏற்கப்பட்டன. வேட்புமனுக்களைத் திரும்பப் பெறுவதற்கு இன்று கடைசி நாளாகும். மாலை 4 மணி வரை வேட்புமனுக்களைத் திரும்பப் பெறலாம். அதன்பிறகு விக்கிரவாண்டி இடைத்தேர்தலில் போட்டியிடும் இறுதிக்கட்ட வேட்பாளர்கள் பட்டியலை தேர்தல் ஆணையம் வெளியிடுகிறது.

இதையும் படிங்க: இதுல ஒரு ரகசியமும் இல்ல…. 12வது குழந்தையை வரவேற்கும் எலான் மாஸ்க்