“என் குழந்தை படிக்கட்டும், அவனுக்கு வேலை எதற்கு?” என்று நினைக்கும் பெற்றோர்களுக்கு ஒரு முக்கியமான செய்தி. குழந்தைப் பருவத்தில் வீட்டு வேலைகளை விரும்பிச் செய்தவர்கள், வளர்ந்த பிறகு பணியிடங்களில் மற்றவர்களை விட மிக வேகமாக முன்னேறுவதாக ஹார்வார்டு பல்கலைக்கழகம் நடத்திய ஆய்வில் தெரியவந்துள்ளது.
85 ஆண்டுகால ஆய்வு சொல்லும் ரகசியம்:
ஹார்வார்டு பல்கலைக்கழகம் சுமார் 85 ஆண்டுகளுக்கும் மேலாக (Harvard Grant Study) ஒரு குறிப்பிட்ட குழுவினரின் வாழ்க்கையைத் தொடர்ச்சியாக ஆய்வு செய்து வருகிறது. இந்த ஆய்வின் முடிவில், சிறுவயதில் தங்களது துணிகளை மடிப்பது, பாத்திரங்களை அடுக்குவது, செடிகளுக்குத் தண்ணீர் ஊற்றுவது போன்ற எளிய வேலைகளைச் செய்த குழந்தைகள், பிற்காலத்தில் மிகப்பெரிய அளவில் சாதிப்பது கண்டறியப்பட்டுள்ளது.
அலுவலகத்தில் எப்படி உதவுகிறது?
சிறுவயதில் தொடங்கும் இந்த வீட்டு வேலைப் பழக்கம், வளர்ந்த பிறகு அலுவலகங்களில் பின்வரும் நன்மைகளைத் தருகிறது.
திட்டமிடல் (Planning):
ஒரு வேலையை எப்படித் தொடங்கி, எப்படி முடிக்க வேண்டும் என்ற தெளிவு இவர்களுக்கு இயல்பாகவே இருக்கிறது.
தன்னம்பிக்கை (Self-confidence):
“என்னால் ஒரு வேலையைச் சிறப்பாகச் செய்ய முடியும்” என்ற எண்ணம் சிறுவயதிலேயே விதைக்கப்படுவதால், சவாலான நேரங்களில் இவர்கள் பதற்றமடைவதில்லை.
வேலையைக் கஷ்டமாகப் பார்க்காமல், அது ஒரு கடமை என்று நினைத்துச் செய்யும் மனப்பக்குவம் இவர்களுக்குக் கிடைக்கிறது.
வீட்டு வேலை என்பது ஒரு குடும்பத்தின் கூட்டுப் பொறுப்பு என்பதை உணர்வதால், அலுவலகத்திலும் சக ஊழியர்களுடன் இணைந்து பணியாற்றுவதில் இவர்கள் கில்லிகளாக இருக்கிறார்கள்.
எப்போது தொடங்கலாம்?
குழந்தைகளுக்கு 3 அல்லது 4 வயதிலிருந்தே சிறு சிறு வேலைகளைக் கொடுத்துப் பழக்கப்படுத்துவது சிறந்தது என ஆராய்ச்சியாளர்கள் கூறுகிறார்கள். “வேலை செய்வது என்பது ஒரு தண்டனை அல்ல, அது ஒரு திறமை” என்பதை அவர்கள் உணரும்போது, எதிர்காலத்தில் ஒரு சிறந்த தலைவராக (Leader) உருவெடுக்க அதுவே அடித்தளமாக அமைகிறது.
எனவே, உங்கள் குழந்தை இனி வீட்டைச் சுத்தம் செய்தால், அது அவர்கள் எதிர்காலப் புரமோஷனுக்கான ‘முதல் படி’ என்று தாராளமாக நம்பலாம்!