சென்சார் போர்டு விஜய்யை சும்மா விடாது!.. உண்மையை உடைத்த தயாரிப்பாளர் சங்கத் தலைவர் முரளி ராமசாமி..

தமிழக வெற்றிக் கழகத் தலைவர் நடிகர் விஜய்யின் கடைசித் திரைப்படமான ‘ஜனநாயகன்’ நாளை (ஜனவரி 9) வெளியாக வேண்டிய நிலையில், படத்திற்குத் தணிக்கைச் சான்றிதழ் வழங்குவதில் ஏற்பட்டுள்ள இழுபறி கோலிவுட் மற்றும் அரசியல் வட்டாரத்தில் பெரும் பரபரப்பை ஏற்படுத்தியுள்ளது. இந்த விவகாரம் குறித்துத் தமிழ்நாடு திரைப்படத் தயாரிப்பாளர் சங்கத் தலைவர் முரளி ராமசாமி முக்கிய கருத்துக்களைப் பகிர்ந்துள்ளார்.

விஜய் படத்துக்கே சிக்கலா?
சென்னையில் செய்தியாளர்களைச் சந்தித்த முரளி ராமசாமியிடம், ‘ஜனநாயகன்’ படத்திற்குச் சென்சார் போர்டு முட்டுக்கட்டை போடுவது குறித்துக் கேள்வி எழுப்பப்பட்டது. அதற்குப் பதிலளித்த அவர்,

“நானும் நடிகர் விஜய்யை வைத்துப் படம் எடுத்தவன் தான். அப்போது எங்களுக்கும் சென்சார் தொடர்பான பிரச்சினைகள் ஏற்பட்டன. ஆனால், தணிக்கைக்குழு என்பது சும்மா ஒரு படத்தை நிறுத்திவிட மாட்டார்கள். படத்தில் ஏதேனும் விதிமீறல்கள் அல்லது சமூகத்தில் பாதிப்பை ஏற்படுத்தும் அம்சங்கள் இருந்தால் மட்டுமே அவர்கள் விளக்கம் கேட்பார்கள்.” என்று தெரிவித்தார்.

பெரிய நட்சத்திரங்களின் படங்களாக இருந்தாலும் சட்ட திட்டங்களுக்கு அவை உட்பட்டதுதான் என்பதை அவர் சுட்டிக்காட்டினார்.

நீதிமன்றம் வரை சென்ற ‘ஜனநாயகன்’ விவகாரம்
சுமார் 500 கோடி ரூபாய் பட்ஜெட்டில் உருவாகியுள்ள ‘ஜனநாயகன்’ திரைப்படம், 5,000-க்கும் மேற்பட்ட திரையரங்குகளில் வெளியாகத் திட்டமிடப்பட்டிருந்தது.

புகார் பின்னணி:
படத்தில் மத உணர்வுகளைப் புண்படுத்தும் காட்சிகள் மற்றும் ராணுவத்தைச் சித்தரிக்கும் விதம் குறித்து வந்த ரகசியப் புகாரின் அடிப்படையில், தணிக்கைக்குழு இதனை மறுஆய்வுக் குழுவிற்கு (Revising Committee) அனுப்பியது.

நீதிமன்றத்தில் தயாரிப்பாளர்:
படத்திற்கு ஏற்கெனவே ‘UA 16+’ சான்றிதழ் வழங்குவதாகக் கூறிவிட்டு, கடைசி நேரத்தில் இழுத்தடிப்பது முறையற்றது எனத் தயாரிப்பு நிறுவனம் சென்னை உயர்நீதிமன்றத்தில் வழக்குத் தொடர்ந்துள்ளது.

யாரோ கொடுத்த ரகசியப் புகாரை வைத்து, படம் ரிலீசாக 3 நாட்களே உள்ள நிலையில் தணிக்கையைத் தள்ளி வைப்பது ஏன்? என நீதிமன்றம் கேள்வி எழுப்பியுள்ளது.

அரசியல் சாயம் பூசப்படுகிறதா?
விஜய் தீவிர அரசியலில் இறங்கியுள்ள நிலையில், திட்டமிட்டே அவரது படத்திற்குத் தணிக்கைக்குழு அழுத்தம் கொடுப்பதாகத் தவெக தொண்டர்கள் குற்றம் சாட்டுகின்றனர். காங்கிரஸ் உள்ளிட்ட எதிர்க்கட்சிகளும் விஜய்க்கு ஆதரவாகக் குரல் கொடுத்து வருகின்றன.

‘ஜனநாயகன்’ படம் நாளை வெளியாகுமா? அல்லது தள்ளிப் போகுமா? என்பது நீதிமன்றத்தின் தீர்ப்பைப் பொறுத்தே அமையும். இதனால் விஜய் ரசிகர்கள் மிகுந்த எதிர்பார்ப்புடன் காத்திருக்கின்றனர்.