தமிழக வெற்றிக் கழகத்தின் தலைவர் விஜய், கரூர் கூட்ட நெரிசல் சம்பவம் தொடர்பாக சிபிஐ விசாரணைக்காக இரண்டு நாள் பயணமாக டெல்லி சென்றுள்ளார். கடந்த 2025 செப்டம்பர் மாதம் கரூரில் நடந்த த.வெ.க பொதுக்கூட்டத்தில் ஏற்பட்ட நெரிசலில் 41 பேர் உயிரிழந்தனர். இந்த வழக்கு தொடர்பாக உச்ச நீதிமன்ற உத்தரவின்படி சிபிஐ தீவிர விசாரணை நடத்தி வரும் நிலையில், இன்று (ஜனவரி 12, 2026) விஜய் டெல்லி அலுவலகத்தில் ஆஜராகியுள்ளார்.
அழுத்தம் கொடுக்கும் அரசியல்:
இந்தச் சூழ்நிலையில், மூத்த பத்திரிகையாளர் ராதாகிருஷ்ணன் விஜய்யின் டெல்லி பயணம் மற்றும் அவர் சந்தித்து வரும் நெருக்கடிகள் குறித்துப் பரபரப்பான கருத்துக்களை வெளியிட்டுள்ளார். அவர் கூறியதாவது,
“2026 சட்டமன்றத் தேர்தல் நெருங்கும் நேரத்தில், விஜய்யை அரசியல் ரீதியாக முடக்கவே இந்தச் சிபிஐ விசாரணை மீண்டும் கிளறப்பட்டுள்ளது. ஏற்கனவே மாநில காவல்துறை விசாரணை முடிவடைந்த ஒரு வழக்கை, இப்போது மீண்டும் தோண்டுவதன் நோக்கம் அவருக்கு அழுத்தம் கொடுப்பதே ஆகும். விஜய் கொஞ்சம் பயந்தவர் தான், சொல்லப்போனால் அவர் நன்றாகவே பயந்தவர். பாஜக இதனைத் தங்களுக்குச் சாதகமாகப் பயன்படுத்திக் கொள்ளப் பார்க்கிறது.”
ஜனநாயகன் படத்திற்கு செக்?
விஜய்யின் கடைசித் திரைப்படமான ‘ஜனநாயகன்’ பொங்கல் வெளியீடாகத் திட்டமிடப்பட்டிருந்த நிலையில், தணிக்கை வாரியத்தின் (CBFC) இழுபறியால் ரிலீஸ் தேதி தள்ளிப்போயுள்ளது. இது குறித்துப் பேசிய ராதாகிருஷ்ணன், “ஒரு பக்கம் சிபிஐ விசாரணை, மறுபக்கம் படத்தின் வெளியீட்டில் சிக்கல் என இருமுனைத் தாக்குதலை பாஜக முன்னெடுத்துள்ளது. விஜய்யை தங்கள் வழிக்குக் கொண்டு வரவும் அல்லது தங்களுக்கு ஆதரவான நிலைப்பாட்டை எடுக்க வைக்கவுமே இத்தனை அழுத்தங்கள் கொடுக்கப்படுகின்றன” எனத் தெரிவித்தார்.
டெல்லியில் நடப்பது என்ன?
டெல்லியில் உள்ள சிபிஐ தலைமையகத்தில் விஜய்யிடம் கரூர் கூட்ட ஏற்பாடுகள் மற்றும் பாதுகாப்பு குறைபாடுகள் குறித்து விசாரணை நடத்தப்பட்டு வருகிறது. இன்று காலை அவர் ஆஜரானபோது, சிபிஐ அதிகாரிகள் சுமார் 4 மணி நேரத்திற்கும் மேலாக விசாரணை நடத்தியதாகத் தகவல்கள் தெரிவிக்கின்றன.
விஜய் மீதான இந்தச் சிபிஐ நடவடிக்கை மற்றும் ‘ஜனநாயகன்’ பட விவகாரம் ஆகியவை தமிழக அரசியலில் பெரும் அதிர்வலைகளை ஏற்படுத்தியுள்ளது. பாஜகவின் இந்த ‘அழுத்த அரசியலை’ விஜய் எப்படி எதிர்கொள்ளப் போகிறார் என்பதே தற்போதைய பெரும் கேள்வி.