இந்தியாவில் லிவ்-இன் (Live-in) உறவுகள் அதிகரித்து வரும் நிலையில், அது தொடர்பான மிக முக்கியமான தீர்ப்பு ஒன்றை அலகாபாத் உயர் நீதிமன்றம் வழங்கியுள்ளது. “லிவ்-இன் உறவுகள் சிலருக்குப் பிடிக்காமல் இருக்கலாம் அல்லது சமூகம் ஏற்க மறுக்கலாம், ஆனால் அதை சட்டவிரோதமானது என்று சொல்ல முடியாது” என நீதிமன்றம் திட்டவட்டமாகத் தெரிவித்துள்ளது.
12 பெண்களின் சட்டப் போராட்டம்:
உத்தரப் பிரதேசத்தைச் சேர்ந்த 12 பெண்கள், தாங்கள் தங்கள் விருப்பப்படி துணையைத் தேர்ந்தெடுத்து லிவ்-இன் உறவில் வாழ்ந்து வருவதாகவும், இதனால் தங்களுக்குக் குடும்பத்தினரிடமிருந்தும் சமூகத்திலிருந்தும் அச்சுறுத்தல் இருப்பதாகவும் கூறி அலகாபாத் உயர் நீதிமன்றத்தில் மனுத் தாக்கல் செய்திருந்தனர். தங்களுக்குப் போலீஸ் பாதுகாப்பு வழங்க வேண்டும் என்பதே அவர்களின் பிரதான கோரிக்கையாக இருந்தது.
நீதிமன்றத்தின் அதிரடித் தீர்ப்பு:
இந்த மனுக்களை விசாரித்த நீதியரசர் விவேக் குமார் சிங், டிசம்பர் 17, 2025 அன்று வரலாற்றுச் சிறப்புமிக்க இந்தத் தீர்ப்பை வழங்கினார். தீர்ப்பின் முக்கிய அம்சங்கள் வருமாறு,
சட்டவிரோதம் அல்ல:
இருவர் பரஸ்பர சம்மதத்துடன் இணைந்து வாழ்வது (Marriage-like relationship) இந்தியச் சட்டப்படி குற்றமோ அல்லது சட்டவிரோதமோ அல்ல.
தனிநபர் சுதந்திரம்:
அரசியல் சாசனத்தின் 21-வது பிரிவு (Article 21) குடிமக்களுக்கு வழங்கியுள்ள வாழும் உரிமையையும், தனிநபர் சுதந்திரத்தையும் எவரும் பறிக்க முடியாது. ஒரு உறவு சமூக மரபுகளுக்குப் புறம்பாக இருப்பதாலேயே அதைச் சட்டம் தண்டிக்காது. சமூகம் ஒரு உறவை அங்கீகரிக்கவில்லை என்பதற்காக அதைச் சட்டவிரோதம் என முத்திரை குத்த முடியாது.
போலீஸ் பாதுகாப்புக்கு உத்தரவு:
“வயது வந்த ஒரு நபர் தனது துணையைத் தேர்ந்தெடுக்கும் உரிமையில் குடும்பத்தினரோ அல்லது மற்றவர்களோ தலையிட முடியாது” என்று குறிப்பிட்ட நீதிபதி, மனுதாரர்களான 12 பெண்களுக்கும் மற்றும் அவர்களது துணைகளுக்கும் தகுந்த போலீஸ் பாதுகாப்பு வழங்க உத்தரவிட்டார்.
அரசின் கடமை ஒவ்வொரு குடிமகனின் உயிர் மற்றும் உடைமைகளைப் பாதுகாப்பதே ஆகும். அவர்கள் திருமணமானவர்களா இல்லையா என்பது இங்கு முக்கியமல்ல” என்று நீதிமன்றம் சுட்டிக்காட்டியுள்ளது. லிவ்-இன் உறவுகள் குறித்துப் பல்வேறு விவாதங்கள் நடைபெற்று வரும் சூழலில், உயர் நீதிமன்றத்தின் இந்தத் தீர்ப்பு தனிநபர் சுதந்திரத்திற்கு வலுசேர்க்கும் ஒன்றாகப் பார்க்கப்படுகிறது.