அமெரிக்க அதிபர் டொனால்ட் டிரம்ப், கிரீன்லாந்து தீவை வாங்குவதில் மீண்டும் தனது பிடிவாதத்தைக் காட்டியுள்ளார். இது உலகப் பொருளாதாரத்திலும், ஐரோப்பிய நாடுகளுடனான உறவிலும் பெரும் விரிசலை ஏற்படுத்தியுள்ளது.
100% உறுதியான மிரட்டல்:
சமீபத்திய பேட்டியில் பேசிய டிரம்ப், “கிரீன்லாந்தை அமெரிக்காவிடம் ஒப்படைக்காவிட்டால், ஐரோப்பிய நாடுகள் மிகக் கடுமையான வரிகளைச் சந்திக்க வேண்டியிருக்கும். இதில் நான் 100% உறுதியாக இருக்கிறேன். எந்த மாற்றமும் கிடையாது,” என அதிரடியாகத் தெரிவித்துள்ளார். பிப்ரவரி 1 முதல் 10% கூடுதல் வரி விதிக்கப்படும் என்றும், ஜூன் 1-க்குள் தீர்வு எட்டப்படாவிட்டால் இது 25% ஆக உயர்த்தப்படும் என்றும் அவர் எச்சரித்துள்ளார்.
ராணுவ நடவடிக்கை:
“பேச்சுவார்த்தை தோல்வியடைந்தால், ராணுவத்தைப் பயன்படுத்தி கிரீன்லாந்தைக் கைப்பற்றுவீர்களா?” என்று செய்தியாளர்கள் கேட்டதற்கு, டிரம்ப் “நோ கமெண்ட்ஸ்” (No Comments) என்று பதிலளித்தது பெரும் அதிர்ச்சியை ஏற்படுத்தியுள்ளது. ராணுவத் தாக்குதலை அவர் மறுக்காதது, ஐரோப்பிய நாடுகளைக் கதிகலங்கச் செய்துள்ளது. “நார்வே எனக்கு நோபல் பரிசு தராததால், இனி நான் அமைதியைப் பற்றி மட்டுமே யோசிக்க வேண்டிய அவசியம் இல்லை” என்று அவர் நார்வே பிரதமருக்கு அனுப்பிய குறுஞ்செய்தியும் தற்போது வெளியாகியுள்ளது.
பழிவாங்கப்படும் 8 நாடுகள்:
கிரீன்லாந்து விவகாரத்தில் அமெரிக்காவின் பிடிவாதத்தை எதிர்த்து வரும் மற்றும் அங்குப் பாதுகாப்புக்காகத் துருப்புகளை அனுப்பியுள்ள 8 முக்கிய நாடுகள் மீது டிரம்ப் தனது கவனத்தைத் திருப்பியுள்ளார்.
“டென்மார்க், பிரிட்டன், பிரான்ஸ், ஜெர்மனி, பின்லாந்து, நார்வே, ஸ்வீடன், நெதர்லாந்து” இந்த நாடுகள் மீது ஏற்கனவே 10% கூடுதல் வரிகளை விதித்துள்ள டிரம்ப், இது இன்னும் அதிகரிக்கும் என மிரட்டியுள்ளார்.
ஐரோப்பா மற்றும் பிரிட்டனின் பதிலடி:
பிரிட்டன் பிரதமர் கெயிர் ஸ்டார்மர், டிரம்பின் இந்தச் செயல் “முற்றிலும் தவறானது” என்றும், இது கூட்டணி நாடுகளுக்கு இடையே ஒரு வர்த்தகப் போரை (Trade War) மூட்டும் என்றும் எச்சரித்துள்ளார். பிரான்ஸ் மற்றும் ஜெர்மனி ஆகிய நாடுகள், அமெரிக்காவின் இந்த ‘பிளாக்மெயில்’ அரசியலுக்கு அடிபணியப் போவதில்லை என்றும், ஐரோப்பிய ஒன்றியம் இதற்கான தகுந்த பதிலடியைத் தரும் என்றும் தெரிவித்துள்ளன.
டிரம்பின் இந்த அறிவிப்பால் உலகப் பங்குச் சந்தைகள் சரிவைச் சந்தித்துள்ளன. கிரீன்லாந்து மக்கள் “நாங்கள் விற்பனைக்கு அல்ல” என்று வீதிகளில் இறங்கிப் போராடி வரும் சூழலில், டிரம்ப் தனது அடுத்த அடியை எப்படி எடுத்து வைப்பார் என்பது உலக நாடுகளிடையே பெரும் கவலையை ஏற்படுத்தியுள்ளது.