தமிழக சட்டமன்ற தேர்தல் களம் இதுவரை கண்டிராத ஒரு மிகப்பெரிய அரசியல் திருப்பத்தை நோக்கி நகர்ந்து கொண்டிருப்பதை லண்டனை சேர்ந்த ஒரு சிறப்பு ஆய்வுக்குழுவின் சமீபத்திய கருத்துக்கணிப்பு உறுதிப்படுத்தியுள்ளது. லண்டனிலிருந்து தமிழகம் வந்து, மாநிலத்தின் அனைத்து மாவட்டங்களிலும் பரவலாக ஆய்வு மேற்கொண்ட இந்த தன்னாட்சி குழு, தமிழக வாக்காளர்களின் மனநிலை கடந்த சில மாதங்களில் பெருமளவு மாறியிருப்பதாக கூறப்படுகிறது. குறிப்பாக, பாரம்பரியமாக நிலவி வந்த இருமுனை போட்டி இந்த முறை முற்றிலுமாக சிதைந்து, ஒரு புதிய அரசியல் சக்தி உள்நுழைந்திருப்பது திராவிட கட்சிகளுக்கு பெரும் அதிர்ச்சியை ஏற்படுத்தியுள்ளது. இந்த கணிப்பின்படி, அதிமுக கூட்டணி அதிக எண்ணிக்கையிலான தொகுதிகளை கைப்பற்றும் என்றாலும், தனிப்பெரும்பான்மையுடன் ஆட்சி அமைப்பதற்கான மந்திர எண்ணை தொடுவதில் சிக்கல் நீடிக்கும் என கூறப்படுகிறது.
இந்த கருத்துக்கணிப்பின் மிகவும் அதிரடியான அம்சம் என்னவென்றால், நடிகர் விஜய்யின் தமிழக வெற்றித் கழகம் இரண்டாவது இடத்தை பிடிக்கும் என்பதாகும். இதுவரை வெறும் சினிமா நட்சத்திரமாக மட்டுமே பார்க்கப்பட்ட விஜய், தனது முதல் தேர்தலிலேயே ஆளுங்கட்சியான திமுகவை பின்னுக்கு தள்ளிவிட்டு இரண்டாம் இடத்திற்கு முன்னேறுவார் என்பது அரசியல் பார்வையாளர்களை வியப்பில் ஆழ்த்தியுள்ளது. விஜய்யின் அரசியல் வருகை குறிப்பாக இளைஞர்கள் மற்றும் முதல்முறை வாக்காளர்கள் மத்தியில் ஒரு மிகப்பெரிய எழுச்சியை ஏற்படுத்தியுள்ளது. ஊழலற்ற நிர்வாகம் மற்றும் மாற்று அரசியல் என்ற அவரது முழக்கம், தற்போதைய அரசியல் சூழலில் அதிருப்தியில் இருக்கும் நடுநிலை வாக்காளர்களைத் தவெக பக்கம் ஈர்த்துள்ளதே இதற்கு முக்கிய காரணமாக சொல்லப்படுகிறது.
மறுபுறம், தமிழகத்தை தற்போது ஆட்சி செய்து வரும் திமுக மூன்றாவது இடத்திற்கு தள்ளப்படும் என்ற அதிர்ச்சி தகவல் அந்த கட்சியின் தலைமைக்கு பெரும் கவலையை அளித்துள்ளது. வாரிசு அரசியல் குறித்த விமர்சனங்கள், விலைவாசி உயர்வு மற்றும் சில அமைச்சர்கள் மீதான அதிருப்தி ஆகியவை திமுகவின் வாக்கு வங்கியில் பெரும் சரிவை ஏற்படுத்தியுள்ளதாக லண்டன் ஆய்வுக்குழு சுட்டிக்காட்டியுள்ளதாக கூறப்படுகிறது. தமிழக வரலாற்றில் ஆளுங்கட்சியாக இருந்துவிட்டு மூன்றாவது இடத்திற்கு ஒரு கட்சி தள்ளப்படுவது என்பது மிக அரிதான ஒன்று. இது நடந்தால், அது திமுகவின் அரசியல் எதிர்காலத்திற்கே ஒரு சவாலாக அமையக்கூடும். பலமான கூட்டணி இருந்தும், மக்கள் மத்தியில் நிலவும் ‘ஆட்சி எதிர்ப்பு அலை’ திமுகவை பலவீனப்படுத்தியுள்ளதை இந்த கணிப்பு வெளிச்சம் போட்டுக் காட்டுகிறது.
இந்த கணிப்புகளின்படி, தமிழகத்தில் எந்தவொரு கட்சிக்கும் அல்லது கூட்டணிக்கும் தனிப்பெரும்பான்மை கிடைக்காது என்பதால் ‘தொங்கு சட்டசபை’ அமைவது உறுதி எனத் தெரிகிறது. அதிமுக கூட்டணிக்கு அதிக தொகுதிகள் கிடைத்தாலும், ஆட்சி அமைக்க தேவையான 118 இடங்களை அவர்களால் எட்ட முடியாது என்ற சூழலில், மற்ற கட்சிகளின் ஆதரவு மிக முக்கியமானதாக மாறும். இத்தகைய இக்கட்டான நிலையில், தமிழகத்தின் அடுத்த ஆட்சியை தீர்மானிக்கும் கிங் மேக்கர் இடத்திற்கு விஜய் உயர்ந்துள்ளார். விஜய்யின் ஆதரவு இன்றி அதிமுகவோ அல்லது மற்றவர்களோ ஆட்சி அமைப்பது இயலாத காரியம் என்ற நிலையை இந்த லண்டன் குழுவின் அறிக்கை தெளிவுபடுத்துகிறது.
அதிமுக கூட்டணியுடன் விஜய் கைகோர்த்தால் மட்டுமே அங்கு ஆட்சி அமைக்க முடியும் என்ற எதார்த்தம் தற்போது நிலவுகிறது. அதிமுகவின் அனுபவமும், விஜய்யின் புதிய எழுச்சியும் இணைந்தால் ஒரு ஸ்திரமான ஆட்சியை வழங்க முடியும் என ஒரு தரப்பினர் கருதினாலும், அதற்கு விஜய் சம்மதிப்பாரா என்பதே இப்போதைய மில்லியன் டாலர் கேள்வி. ஏனெனில், தனது முதல் தேர்தலிலேயே ஒரு மாற்று சக்தியாக தன்னை முன்னிறுத்திய விஜய், மீண்டும் ஒரு திராவிட கட்சியுடன் கூட்டணி அமைத்தால் அது தனது தனித்துவத்தை பாதிக்கும் என்று கருதக்கூடும். ‘ஆட்சியிலும் பங்கு, அதிகாரத்திலும் பங்கு’ என்ற தனது கொள்கையில் அவர் உறுதியாக இருக்கும் பட்சத்தில், அதிமுக அத்தகைய கோரிக்கைகளுக்கு இணங்குமா என்பதும் விவாதத்திற்குரிய ஒன்றாகவே இருக்கிறது.
இறுதியாக, தமிழக அரசியல் வரலாற்றில் ஒரு மிகப்பெரிய அதிகார பகிர்வுக்கான காலம் நெருங்கிவிட்டதை இந்த கருத்துக்கணிப்பு உணர்த்துகிறது. இருப்பினும் சமூக வலைத்தளங்களில் மட்டுமே பகிரப்பட்டுள்ள இந்த தகவல்களின் உண்மைத்தன்மை குறித்து கேள்வி எழுப்பப்படுகிறது. இந்த கருத்துக்கணிப்பு உண்மையா? பொய்யா? என்பது தேர்தல் ரிசல்ட்டில் தெரிந்துவிடும்