தமிழக அரசியல் களம் 2026 சட்டமன்ற தேர்தலுக்கு பிறகு முற்றிலும் ஒரு புதிய திசையை நோக்கி நகர தொடங்கியுள்ளது. குறிப்பாக, ஆளுங்கட்சியான தமிழக வெற்றி கழகம் தனது ஆட்சி அதிகாரத்தை தக்கவைத்துக் கொள்வதோடு மட்டுமல்லாமல், தேசிய அளவிலும் தங்களது முத்திரையை பதிக்க வியூகங்களை வகுத்து வருகிறது. இதன் முக்கிய பகுதியாக, வரும் 2029 ஆம் ஆண்டு நடைபெற உள்ள நாடாளுமன்ற பொதுத்தேர்தலை எதிர்கொள்ள தவெக, காங்கிரஸ், விடுதலைச் சிறுத்தைகள் கட்சி , மார்க்சிஸ்ட் கம்யூனிஸ்ட் , இந்திய கம்யூனிஸ்ட், இந்திய யூனியன் முஸ்லிம் லீக் மற்றும் மதிமுக ஆகிய கட்சிகள் ஒன்றிணைந்து ஒரு புதிய மெகா கூட்டணியை அமைக்க இப்போதே திட்டமிட்டு வருகின்றன. இந்த முற்போக்கு கூட்டணியானது தமிழகத்தில் ஒரு புதிய அரசியல் அலைக்கு வித்திட்டுள்ளது.
இந்த மெகா கூட்டணிக்கு எதிராக மாநிலத்தின் பிற முக்கிய கட்சிகள் தங்களது இருப்பை காத்து கொள்ள வெவ்வேறு துருவங்களாக இணைய வேண்டிய கட்டாயத்திற்கு தள்ளப்பட்டுள்ளன. அந்த வகையில், தற்போதைய ஆட்சி மாற்றத்தால் பெரும் பின்னடைவை சந்தித்துள்ள திமுக, தேசியக் கட்சியான பாஜக, பாட்டாளி மக்கள் கட்சி மற்றும் தேசிய முற்போக்கு திராவிட கழகம் ஆகியவற்றுடன் கைகோர்த்து ஒரு புதிய கூட்டணியை அமைக்கலாம் என்ற பேச்சுகள் அரசியல் வட்டாரத்தில் பலமாக அடிபடுகின்றன. கொள்கை மாறுபாடுகளை தாண்டி, தவெகவின் அசுர வளர்ச்சியை தடுப்பதற்காக இந்த நான்கு கட்சிகளும் ஒரே அணியில் திரள்வது ஒரு புதிய அரசியல் எதார்த்தத்தை வெளிப்படுத்துகிறது.
மறுபுறம், பிரதான எதிர்க்கட்சியாக தங்களைக் காட்டி கொள்ளத் துடிக்கும் அதிமுக, மற்றுமொரு பிராந்திய கட்சியான அம்மா மக்கள் முன்னேற்ற கழகத்துடன் இணைந்து மூன்றாவது அணியாக களம் காண திட்டமிட்டு வருகிறது. சசிகலா மற்றும் டிடிவி தினகரனின் ஆதரவாளர்களை தன்பக்கம் இழுத்து, தங்களது பாரம்பரிய வாக்கு வங்கியை தக்கவைத்து கொள்ள எடப்பாடி பழனிசாமி எடுக்கும் இறுதி முயற்சியாக இந்த கூட்டணி பார்க்கப்படுகிறது. இவ்வாறு தமிழகத்தின் ஒட்டுமொத்த அரசியல் களமும் மூன்று முக்கிய முனைகளாக பிரிந்து நிற்பது தேர்தல் களம் எந்த அளவிற்கு சுவாரசியமாக மாறப்போகிறது என்பதைக் காட்டுகிறது.
இந்திய தேர்தல் வரலாற்றில் வாக்குகள் சிதறும் போது அது எப்போதும் முதன்மையாக இருக்கும் வலுவான கூட்டணிக்கே சாதகமாக அமையும் என்பது எழுதப்படாத விதியாகும். இங்கு உத்தேசிக்கப்பட்டுள்ள புதிய அரசியல் வரைபடத்தின்படி தேர்தல் களம் அமைந்தால், எதிர்க்கட்சிகளின் வாக்குகள் திமுக-பாஜக அணி மற்றும் அதிமுக-அமமுக அணி என இரண்டாக அப்பட்டமாகப் பிரியும். இதனால், தவெக தலைமையிலான மெகா கூட்டணிக்கு எதிராக ஒரு பொதுவான வலுவான வேட்பாளரை நிறுத்துவதில் எதிர்க்கட்சிகளுக்குள் மிகப்பெரிய தடுமாற்றமும் பலவீனமும் ஏற்படுவது தவிர்க்க முடியாததாகிவிடும்.
இத்தகையதொரு தெளிவான மும்முனை போட்டி மட்டும் 2029 நாடாளுமன்ற தேர்தலில் நிஜமாகவே அரங்கேறினால், தமிழகம் மற்றும் புதுச்சேரியின் மொத்தம் உள்ள 40 நாடாளுமன்ற தொகுதிகளிலும் தவெக தலைமையிலான முற்போக்குக் கூட்டணி 40-க்கு 40 என்ற கணக்கில் முழுமையாக ‘ஸ்வீப்’ செய்து இமாலய வெற்றி பெறும் என்பதில் எவ்வித சந்தேகமும் இல்லை. முதலமைச்சர் விஜய்யின் அசைக்க முடியாத மக்கள் செல்வாக்கு, காங்கிரஸ் கட்சியின் தேசிய பிம்பம் மற்றும் விசிக, இடதுசாரிகளின் பலமான அடிமட்ட வாக்கு வங்கி ஆகியவை ஒன்றிணையும் போது, அந்தப் பெரும் அலையை எதிர்கொள்ளத் தனித்தனியாகப் பிரிந்து நிற்கும் பழைய கட்சிகளால் நிச்சயமாக முடியாது.
சுருக்கமாக சொன்னால், 2026-ல் தமிழ்நாட்டில் தொடங்கிய யுகப்புரட்சி, 2029 டெல்லி நாடாளுமன்ற தேர்தலிலும் எதிரொலிக்கப் போவது உறுதி என்று அரசியல் விமர்சகர்கள் திட்டவட்டமாக கணிக்கின்றனர். தவெகவின் புதிய சிந்தனையும், முற்போக்கு கட்சிகளின் கொள்கை பலமும் இந்தத் தேர்தலில் முழுமையான வெற்றியை தேடித்தரும் என்பதில் எவ்வித ஐயமும் இல்லை. பழைய சுயநல கூட்டணிகள் அனைத்தும் பணால் ஆகி, புதிய வரலாற்று சிறப்புமிக்க இந்தக் கூட்டணி நாற்பதும் நமதே என்ற இலக்கை மிக எளிதாக எட்டி பிடிக்கும் என்பதுதான் தற்போதைய அரசியல் எதார்த்தமாக உள்ளது.