தமிழகத்தில் கல்லூரி மாணவர்களுக்கு இலவச லேப்டாப் வழங்கும் ‘உலகம் உங்கள் கையில்’ திட்டத்தை முதல்வர் மு.க. ஸ்டாலின் கடந்த வாரம் தொடங்கி வைத்தார். இந்த விழாவில் பங்கேற்ற துணை முதல்வர் உதயநிதி ஸ்டாலின், மாணவர்கள் லேப்டாப்பை எதற்குப் பயன்படுத்த வேண்டும் என்பது குறித்து மிக எதார்த்தமாகப் பேசினார்.
சினிமா, கேம் – உதயநிதி போட்ட கண்டிஷன்:
மாணவர்கள் மத்தியில் பேசிய உதயநிதி ஸ்டாலின், “அரசு பல கோடி ரூபாய் செலவு செய்து மாணவர்களுக்கு இந்த லேப்டாப்களை வழங்குகிறது. ஆனால், லேப்டாப் வாங்கிய கையோடு அதைப் படம் பார்ப்பதற்கும், யூடியூப் வீடியோக்கள் பார்ப்பதற்கும், கேம் விளையாடுவதற்கும் மட்டுமே பயன்படுத்தக் கூடாது. பொழுதுபோக்கிற்காகச் செலவிடும் நேரத்தைக் குறைத்துக்கொண்டு, உங்களின் கல்விக்காகவும், வருங்கால வேலை வாய்ப்புக்காகவும் இதைப் பயன்படுத்த வேண்டும்,” என அறிவுறுத்தினார்.
ஏஐ (AI) உலகத்துக்கு ரெடி ஆகுங்க:
தற்போது உலகம் முழுவதும் செயற்கை நுண்ணறிவு (AI) தொழில்நுட்பம் வளர்ந்து வருவதைச் சுட்டிக்காட்டிய அவர், “உங்களிடம் உள்ள லேப்டாப்பில் AI தொடர்பான புதிய விஷயங்களைக் கற்றுக்கொள்ளுங்கள். உலகத்தோடு போட்டி போடத் தேவையான திறமைகளை வளர்த்துக்கொள்ள இந்த லேப்டாப் ஒரு பெரிய வாய்ப்பு. இதை ஒரு வெறும் பரிசாகப் பார்க்காமல், உங்கள் முன்னேற்றத்திற்கான முதலீடாகப் பாருங்கள்,” என்று கேட்டுக்கொண்டார்.
திட்டத்தின் சிறப்பம்சங்கள்:
10 லட்சம் கல்லூரி மாணவர்களுக்கு லேப்டாப் வழங்கப்படுகிறது. அரசு மற்றும் அரசு உதவிபெறும் கலை, அறிவியல், பொறியியல், மருத்துவம் மற்றும் பாலிடெக்னிக் மாணவர்கள் பயன் பெறுவார்கள். லேட்டஸ்ட் அசிஸ் (Asus), டெல் (Dell) மற்றும் ஏசர் (Acer) நிறுவன லேப்டாப்கள், அதோடு 6 மாத கால இலவச AI (Perplexity Pro) சந்தாவும் வழங்கப்படுகிறது.
“படிப்பு முக்கியம் பிகிலு” என்ற பாணியில் உதயநிதி ஸ்டாலின் மாணவர்களுக்கு விடுத்த இந்த வேண்டுகோள், சமூக வலைதளங்களில் இளைய தலைமுறையினரிடையே பெரும் வரவேற்பைப் பெற்றுள்ளது.