உலகப் புகழ்பெற்ற கால்பந்து வீரர் லியோனல் மெஸ்ஸி பங்கேற்ற நிகழ்ச்சியில், அவரைப் பார்க்க முடியாததால் ரசிகர்கள் வன்முறையில் ஈடுபட்டது தொடர்பாக, மேற்கு வங்க முதலமைச்சர் மம்தா பானர்ஜி பகிரங்கமாக மன்னிப்புக் கேட்டுள்ளார். மேலும், இதுகுறித்து விசாரிக்க ஓய்வு பெற்ற நீதிபதி தலைமையில் உயர்மட்டக் குழுவை அமைப்பதாக அவர் அறிவித்துள்ளார்.
சால்ட் லேக் ஸ்டேடியத்தில் நடைபெற்ற பிரமாண்ட நிகழ்ச்சியில் மெஸ்ஸி கலந்துகொண்டார். மெஸ்ஸியை நெருக்கமாகக் காண டிக்கெட் வாங்கியிருந்த ஆயிரக்கணக்கான ரசிகர்கள், சரியான நிர்வாகம் இல்லாததால் அவரைப் பார்க்க முடியவில்லை என்று கூறிப் போராட்டத்திலும் வன்முறையிலும் ஈடுபட்டனர். கூட்டத்தைக் கலைக்க போலீசார் லேசான தடியடி நடத்த வேண்டிய நிலை ஏற்பட்டது.
நிர்வாகக் குறைபாடுதான் காரணம் :
இந்தச் சம்பவம் மேற்கு வங்க மாநிலத்திற்கே சர்வதேச அரங்கில் அவப்பெயரை ஏற்படுத்திய நிலையில், முதலமைச்சர் மம்தா பானர்ஜி இந்தச் செயல்பாடுகளுக்குத் தனது வருத்தத்தைத் தெரிவித்துக் கொண்டார்.
மம்தா பானர்ஜி பேசுகையில், “நிகழ்ச்சி ஏற்பாட்டில் நிர்வாகக் குறைபாடு இருந்தது எனக்கு அதிர்ச்சியளிக்கிறது. இதுகுறித்து நான் மெஸ்ஸியிடமும், ரசிகர்கள் சார்பாகவும் மன்னிப்புக் கேட்டுக் கொள்கிறேன். இந்தச் சம்பவம் மிகவும் வருந்தத்தக்கது. இதுதொடர்பாக உயர்மட்ட விசாரணை நடத்த ஓய்வு பெற்ற நீதிபதி தலைமையில் ஒரு குழு அமைக்கப்படும்,” என்று அறிவித்துள்ளார்.
மேலும், இந்த நிகழ்வை ஏற்பாடு செய்த நிகழ்ச்சி ஏற்பாட்டாளர் சதத்ரு தத்தா என்பவர் போலீசாரால் கைது செய்யப்பட்டுள்ளார். டிக்கெட் பணம் உரிய ரசிகர்களுக்குத் திரும்ப வழங்கப்படும் என்றும் காவல்துறை சார்பில் தெரிவிக்கப்பட்டுள்ளது.
கடந்த 14 ஆண்டுகளுக்குப் பிறகு இந்தியாவுக்கு வந்துள்ள மெஸ்ஸியைப் பார்க்க ரசிகர்கள் மிகுந்த எதிர்பார்ப்புடன் வந்த நிலையில், இந்தச் சம்பவம் பெரும் ஏமாற்றத்தை ஏற்படுத்தியுள்ளது. அகில இந்திய கால்பந்து கூட்டமைப்பு, இது ஒரு தனியார் நிறுவனத்தால் ஏற்பாடு செய்யப்பட்ட நிகழ்வு, தங்களுக்கும் இதற்கும் தொடர்பில்லை என்று விளக்கமளித்துள்ளது குறிப்பிடத்தக்கது.