நடிகர் விஜய்யின் மிகவும் எதிர்பார்க்கப்படும் ‘ஜனநாயகன்’ திரைப்படத்தின் ரிலீஸ் சிக்கல், இப்போது டெல்லி வரை சென்று பெரும் ஏமாற்றத்தில் முடிந்துள்ளது. சென்சார் சான்றிதழ் விவகாரத்தில் சென்னை உயர்நீதிமன்றத்தின் தடையை எதிர்த்து, படக்குழு தாக்கல் செய்த மேல்முறையீட்டு மனுவை விசாரிக்க உச்ச நீதிமன்றம் அதிரடியாக மறுத்துவிட்டது.
என்ன நடந்தது நீதிமன்றத்தில்?
ஜனநாயகன் படத்திற்கு U/A சான்றிதழ் வழங்க சென்னை உயர்நீதிமன்றத்தின் தனி நீதிபதி உத்தரவிட்டிருந்தார். ஆனால், இதனை எதிர்த்து தணிக்கைக் குழு (CBFC) மேல்முறையீடு செய்தபோது, இரு நீதிபதிகள் அமர்வு அந்த உத்தரவிற்கு இடைக்காலத் தடை விதித்தது. இதனால் அதிர்ச்சியடைந்த தயாரிப்பு நிறுவனம், ‘ராக்கெட்’ வேகத்தில் உச்ச நீதிமன்றத்தை நாடியது.
இன்று இந்த மனுவை பரிசீலித்த உச்ச நீதிமன்ற நீதிபதிகள், “நேரடியாக இங்கே வராமல், முதலில் உயர்நீதிமன்றத்தின் இரு நீதிபதிகள் அமர்வை அணுகுங்கள்” என கறாராகக் கூறி மனுவை ஏற்க மறுத்துவிட்டனர்.
படக்குழுவுக்கு விழுந்த பலத்த அடி!
இந்தத் தீர்ப்பால் ‘ஜனநாயகன்’ படக்குழுவினர் நிலைகுலைந்து போயுள்ளனர். பொங்கல் ரிலீஸை இலக்கு வைத்துத் திட்டமிட்ட படக்குழுவுக்கு, இப்போது உச்ச நீதிமன்றமே கையை விரித்துள்ளது பெரும் பின்னடைவாகப் பார்க்கப்படுகிறது.
சென்சார் சிக்கல்:
படத்தில் இடம்பெற்றுள்ள சில அரசியல் வசனங்கள் மற்றும் காட்சிகள் தணிக்கை குழுவால் ஆட்சேபிக்கப்பட்டுள்ளன.
உச்ச நீதிமன்றத்தின் அறிவுரைப்படி, மீண்டும் சென்னை உயர்நீதிமன்றத்திலேயே முறையிட வேண்டிய கட்டாயத்திற்கு படக்குழு தள்ளப்பட்டுள்ளது.
ரசிகர்கள் அதிர்ச்சி!
“தில்லி வரை போயும் காரியம் கைக்கூடவில்லையே” என விஜய் ரசிகர்கள் சமூக வலைதளங்களில் கவலை தெரிவித்து வருகின்றனர். ‘சோலி முடிஞ்சு’ என்று சொல்லும் அளவிற்கு படத்தின் ரிலீஸ் தேதி தள்ளிப் போய்க்கொண்டே இருப்பது கோலிவுட் வட்டாரத்தில் பெரும் விவாதத்தை கிளப்பியுள்ளது.
உயர்நீதிமன்றத்தின் அடுத்த கட்ட விசாரணையில் ‘ஜனநாயகன்’ தப்பிக்குமா? அல்லது தணிக்கைக் குழுவின் கத்தரிக்கு இரையாகுமா? என்பதைப் பொறுத்திருந்துதான் பார்க்க வேண்டும்.