தமிழக அரசியல் களத்தில் 2026 சட்டமன்ற தேர்தலை நோக்கிய நகர்வுகள் முன்னெப்போதும் இல்லாத வகையில் ஒரு மிகப்பெரிய மர்மத்தையும், சஸ்பென்ஸையும் உள்ளடக்கியுள்ளன. திமுக, அதிமுக ஆகிய இரு திராவிடக் கட்சிகள் மற்றும் புதிய வரவான விஜய் தலைமையிலான தமிழக வெற்றி கழகம் ஆகிய மூன்றுக்கும் இடையே யார் வெற்றியாளர் என்ற கேள்விக்கு விடை காண முடியாமல் கருத்துக்கணிப்பு நிபுணர்களே குழப்பத்தில் ஆழ்ந்துள்ளனர். இதற்கு மிக முக்கிய காரணமாக பார்க்கப்படுவது, சுமார் 40 சதவீத வாக்காளர்கள் தாங்கள் யாருக்கு வாக்களிக்க போகிறோம் என்பதை வெளிப்படையாக சொல்லாமல் மௌனம் காப்பதுதான். இந்த ‘மௌன வாக்காளர்களின்’ மனவோட்டம் என்ன என்பதுதான் இப்போது தமிழக அரசியலின் மையப்புள்ளியாக மாறியுள்ளது.
கடந்த கால தேர்தல்களை போலன்றி, இந்த முறை மக்கள் தங்களின் அரசியல் விருப்பங்களை வெளிப்படையாக பகிர்ந்து கொள்வதில் மிகுந்த எச்சரிக்கை காட்டுகிறார்கள். குறிப்பாக, ஆளுங்கட்சியின் நலத்திட்டங்களை பெற்றுக்கொண்டாலும், எதிர்க்கட்சியின் நீண்டகால ஆதரவாளராக தங்களை காட்டிக்கொண்டாலும், வாக்குச்சாவடிக்குள் செல்லும்போது அவர்கள் எடுக்கப்போகும் முடிவு முற்றிலும் வேறாக இருக்கலாம். இந்த 40 சதவீத வாக்காளர்கள் என்பது ஒரு சாதாரண எண்ணிக்கை அல்ல; இது தேர்தலின் போக்கையே தலைகீழாக மாற்றக்கூடிய ஒரு மிகப்பெரிய சக்தி. திராவிட கட்சிகளுக்கு மாற்றாக ஒரு புதிய சக்தி வேண்டுமா அல்லது பழக்கமான நிர்வாகமே தொடர வேண்டுமா என்ற ஊசலாட்டம் இவர்களிடையே நிலவுவது, தேர்தல் முடிவுகளை யாராலும் கணிக்க முடியாத ஒரு சஸ்பென்ஸ் திரில்லராக மாற்றியுள்ளது.
புதிய வரவான தவெக, இளைஞர்கள் மற்றும் முதல்முறை வாக்காளர்களின் வாக்குகளை பெருமளவில் கவரும் என்று எதிர்பார்க்கப்பட்டாலும், அந்த வாக்குகள் எந்த அளவில் சீட்டுகளாக கன்வர்ட் மாறும் என்பதில் இன்னும் தெளிவில்லை. அதேபோல், அதிமுகவின் உட்கட்சி விவகாரங்கள் மற்றும் திமுக மீதான அதிருப்தி அலை ஆகியவையும் இந்த மௌன வாக்காளர்களை தீர்மானிக்கும் காரணிகளாக உள்ளன. இந்த 40 சதவீத மக்கள், பாரம்பரிய அரசியல் கட்சிகளின் உத்திகளை கவனித்து கொண்டுதான் இருக்கிறார்கள். இலவசங்கள் மற்றும் கவர்ச்சிகரமான வாக்குறுதிகள் இந்த தரப்பை ஈர்க்குமா அல்லது நேர்மையான நிர்வாகத்தை நோக்கிய ஒரு புரட்சிகரமான மாற்றத்திற்கு இவர்கள் வித்திடுவார்களா என்பதே இப்போதுள்ள மிகப்பெரிய கேள்வி.
கருத்துக்கணிப்பு நிபுணர்கள் கள ஆய்வுகளில் ஈடுபடும்போது, மக்கள் பொதுவாக கொடுக்கும் பதில்களுக்கும் அவர்களின் உண்மையான நோக்கத்திற்கும் இடையே ஒரு மிகப்பெரிய இடைவெளி இருப்பதை உணர்கிறார்கள். “யாருக்கு ஓட்டு?” என்ற கேள்விக்கு “நேரம் வரும்போது முடிவு செய்வோம்’ என்றோ அல்லது பொதுவான பதில்களையோ அளிப்பதன் மூலம் தங்களின் ரகசியத்தை அவர்கள் காக்கிறார்கள். இது அரசியல் கட்சிகளுக்கு பெரும் தலைவலியை ஏற்படுத்தியுள்ளது; ஏனெனில் யாருக்காக தங்கள் தேர்தல் வியூகங்களை வகுப்பது என்பதில் அவர்களுக்கு தெளிவு கிடைக்கவில்லை. இந்த 40 சதவீத வாக்காளர்கள் உண்மையில் ஒரு ‘ஸ்லீப்பர் செல்’ போல செயல்பட்டு, தேர்தல் நாளில் ஒரு மிகப்பெரிய அதிர்ச்சியை பரிசாக அளிக்கக்கூடும்.
மொத்தத்தில் 2026 தேர்தல் என்பது தமிழகத்தின் அரசியல் வரலாற்றில் ஒரு மைல்கல்லாக அமையப்போவது உறுதி. மௌனம் காக்கும் அந்த 40 சதவீத வாக்காளர்களின் கைவிரல் மை தான், அடுத்த ஐந்தாண்டுகளுக்கு தமிழகத்தை ஆளப்போவது யார் என்பதை தீர்மானிக்க போகிறது. இது வெறும் ஆட்சி மாற்றத்திற்கான தேர்தல் மட்டுமல்ல, மக்களின் உண்மையான எதிர்பார்ப்பு என்ன என்பதை உலகுக்கு பறைசாற்றும் தேர்தலாகும். திமுகவின் அனுபவமா, அதிமுகவின் மீள்வருகையா அல்லது விஜய்யின் புதிய அலை வெற்றியா என்ற சஸ்பென்ஸ் மே மாதம் வாக்கு எண்ணிக்கை முடியும் வரை நீடிக்கும். தமிழக மக்களின் இந்த மௌனம், ஒரு மிகப்பெரிய அரசியல் சுனாமிக்கு முன்னால் இருக்கும் அமைதியா என்பதை பொறுத்திருந்துதான் பார்க்க வேண்டும்.