பொருளாதார நெருக்கடியின் விளிம்பில் தத்தளிக்கும் பாகிஸ்தான், தற்போது ஐக்கிய அரபு அமீரகம் வழங்கிய 3.5 பில்லியன் டாலர் கடனை திருப்பிச் செலுத்த வேண்டிய இக்கட்டான சூழலுக்கு தள்ளப்பட்டுள்ளது.
2019-ஆம் ஆண்டு பாகிஸ்தானின் அந்நியச் செலாவணி இருப்பை தக்கவைக்க அமீரகம் இந்த நிதியுதவியை வழங்கியது. பலமுறை கால அவகாசம் நீட்டிக்கப்பட்ட போதிலும், தற்போது அமீரக அரசு இந்த தொகையை உடனடியாக திரும்ப கோருவது பாகிஸ்தானுக்கு பெரும் அதிர்ச்சியை ஏற்படுத்தியுள்ளது. ஏற்கெனவே அத்தியாவசிய பொருட்களின் விலை உயர்வால் மக்கள் அவதிப்படும் நிலையில், இந்த திடீர் நெருக்கடி அந்நாட்டின் நிதி எதிர்காலத்தை கேள்விக்குறியாக்கியுள்ளது.
பாகிஸ்தானின் தற்போதைய அந்நிய செலாவணி இருப்பு சுமார் 16.5 பில்லியன் டாலராக உள்ளது. ஆனால், வரும் ஏப்ரல் மாதத்திற்குள் அமீரகத்தின் கடன், ஐரோப்பியப் பத்திரங்கள் மற்றும் பிற சர்வதேச நிலுவைத் தொகைகள் என மொத்தம் 4.8 பில்லியன் டாலர்களை செலுத்த வேண்டிய கட்டாயத்தில் உள்ளது. இதனை செலுத்தினால், பாகிஸ்தானின் கையிருப்பு சர்வதேச நாணய நிதியம் நிர்ணயித்துள்ள குறைந்தபட்ச அளவிற்கும் கீழே சரிந்துவிடும். இது சர்வதேச அளவில் பாகிஸ்தானின் கடன் நம்பகத்தன்மையை கடுமையாக பாதிக்கும் என்பதால், அந்நாட்டு அரசு பெரும் கலக்கத்தில் ஆழ்ந்துள்ளது.
மறுபுறம், பாகிஸ்தான் ஊடகங்களும் சில அரசியல் விமர்சகர்களும் இந்த நெருக்கடியை திசைதிருப்பும் முயற்சியில் ஈடுபட்டுள்ளனர். ஐக்கிய அரபு அமீரகத்திற்கு தற்போது நிதி தேவை அதிகமாக இருப்பதால் பாகிஸ்தான் உதவி செய்வது போன்ற ஒரு பொய்யான பிம்பத்தை அவர்கள் உருவாக்கி வருகின்றனர். ஆனால், உண்மையில் அமீரகம் மிகப்பெரிய அளவிலான தங்க இருப்பையும் பணப்புழக்கத்தையும் கொண்ட நாடு. 3 பில்லியன் டாலர் என்பது அவர்களுக்கு ஒரு பெரிய தொகையல்ல. பாகிஸ்தானின் வெளியுறவு கொள்கையில் நிலவும் தடுமாற்றங்கள் மற்றும் ஈரான் விவகாரத்தில் அவர்களின் நிலைப்பாடு போன்ற காரணங்களாலேயே அமீரகம் இந்த அழுத்தத்தை கொடுப்பதாக அரசியல் ஆய்வாளர்கள் கருதுகின்றனர்.
பாகிஸ்தானின் மற்ற நட்பு நாடுகளான சவுதி அரேபியாவும் சீனாவும் கூட தற்போது கறார் காட்ட தொடங்கியுள்ளன. சவுதி அரேபியா தான் வழங்கிய 6.5 பில்லியன் டாலர் கடனை திரும்ப கேட்கக்கூடும் என்ற வதந்திகள் பரவி வரும் நிலையில், சீனா தனது மின் நிறுவனங்களுக்கு சேர வேண்டிய 220 மில்லியன் டாலர் நிலுவை தொகையை உடனடியாக கேட்டுள்ளது. சீனா கூடுதலாக நிதி கொடுத்து உதவும் என்று பாகிஸ்தான் நம்பி கொண்டிருந்த நிலையில் கொடுத்த கடனை திருப்பி கேட்பது பாகிஸ்தானுக்கு பெரும் அதிர்ச்சியை ஏற்படுத்தியுள்ளது.
இந்த கடுமையான நிதி நெருக்கடிக்கு மத்தியிலும் பாகிஸ்தான் தனது பாதுகாப்பு திட்டங்களுக்காக பெரும் தொகையை செலவிடப் போவதாக அறிவிப்பது நகைப்புக்குரியதாக உள்ளது. உள்நாட்டில் டீசல் மற்றும் பெட்ரோல் விலையை 50 சதவீதத்திற்கும் மேல் உயர்த்திவிட்டு, சர்வதேச அளவில் தனது கௌரவத்தை விட்டுக்கொடுக்க மாட்டோம் என்று பேசுவது யதார்த்தத்திற்கு புறம்பானது. சர்வதேச நாணய நிதியத்தின் ஆதரவை பெற வேண்டுமானால், வளைகுடா நாடுகளின் பிணை உத்தரவாதம் மிக அவசியம். அந்த நாடுகள் இப்போது விலகி நிற்பது பாகிஸ்தான் ஒரு மாபெரும் பொருளாதார வீழ்ச்சியை நோக்கி செல்வதையே காட்டுகிறது.