வெனிசுலாவில் நிகழ்ந்துள்ள அதிரடி அரசியல் மாற்றங்களைத் தொடர்ந்து, அந்நாட்டின் கச்சா எண்ணெய்யை இந்தியாவுக்கு விற்பனை செய்ய அமெரிக்க அதிபர் டொனால்ட் ட்ரம்ப் தலைமையிலான அரசு பச்சைக்கொடி காட்டியுள்ளது. இதன் மூலம் கடந்த சில ஆண்டுகளாக முடங்கிக்கிடந்த இந்தியா – வெனிசுலா வர்த்தக உறவு, அமெரிக்காவின் நேரடி மேற்பார்வையில் மீண்டும் தொடங்க உள்ளது.
ட்ரம்ப் அரசின் புதிய ‘ஆஃபர்’:
வெனிசுலாவில் நிக்கோலஸ் மதுரோ தலைமையிலான ஆட்சி மாற்றப்பட்ட பிறகு, அந்நாட்டின் எண்ணெய் வளங்களை அமெரிக்கா தனது முழு கட்டுப்பாட்டிற்குள் கொண்டு வந்துள்ளது. இது குறித்து வெள்ளை மாளிகை அதிகாரிகள் கூறியதாவது,
“வெனிசுலாவின் சேமிப்பில் உள்ள சுமார் 3 முதல் 5 கோடி பீப்பாய் கச்சா எண்ணெய்யை அமெரிக்கா நேரடியாக சர்வதேச சந்தையில் விற்கும். இந்தியா தனது எரிசக்தி தேவைகளுக்காக இந்த எண்ணெய்யை தாராளமாக வாங்கிக் கொள்ளலாம். இதற்கான வர்த்தக நடைமுறைகளை அமெரிக்காவே முன்னின்று நடத்தும்.”
ரஷ்யாவுக்கு செக்:
இந்தியா அதிக அளவில் ரஷ்யாவிடம் இருந்து எண்ணெய் வாங்குவதை ட்ரம்ப் அரசு விரும்பவில்லை. ரஷ்ய எண்ணெய் இறக்குமதியைக் குறைக்க இந்தியாவுக்கு அழுத்தம் கொடுத்து வந்த ட்ரம்ப், தற்போது அதற்கு மாற்றாக வெனிசுலா எண்ணெய்யை முன்வைத்துள்ளார்.
இதன் மூலம் உலக சந்தையில் எண்ணெய் விலையை $50-க்கு கொண்டு வர ட்ரம்ப் திட்டமிட்டுள்ளதால், இந்தியாவுக்கு மலிவான விலையில் எண்ணெய் கிடைக்க வாய்ப்புள்ளது.
நிலுவைத் தொகை வசூல்:
வெனிசுலாவிடம் இருந்து இந்தியாவுக்கு வரவேண்டிய சுமார் $1 பில்லியன் (சுமார் ₹8,400 கோடி) நிலுவைத் தொகையை இந்த வர்த்தகத்தின் மூலம் மீட்க முடியும் என எதிர்பார்க்கப்படுகிறது.
சுத்திகரிப்பு வசதி:
இந்தியாவின் ரிலையன்ஸ் போன்ற பெரிய நிறுவனங்களின் சுத்திகரிப்பு ஆலைகள், வெனிசுலாவின் ‘கனரக கச்சா எண்ணெய்யை’ (Heavy Crude) கையாளுவதற்கென்றே வடிவமைக்கப்பட்டவை என்பது குறிப்பிடத்தக்கது.
அமெரிக்காவின் நிபந்தனை:
இந்த வர்த்தகம் முற்றிலும் அமெரிக்காவின் கட்டுப்பாட்டில் இருக்கும். விற்பனை மூலம் வரும் பணம் அமெரிக்காவின் வங்கிக் கணக்குகளில் சேமிக்கப்பட்டு, பின்னர் வெனிசுலா மக்களின் நலனுக்காக மட்டுமே பயன்படுத்தப்படும் என அமெரிக்க எரிசக்தித் துறை செயலாளர் கிறிஸ்டோபர் ரைட் தெரிவித்துள்ளார். “நீங்கள் அமெரிக்காவுடன் இணைந்து எண்ணெய் விற்கலாம் அல்லது விற்காமல் போகலாம்” என அவர் உலக நாடுகளுக்குத் தெளிவான செய்தியை விடுத்துள்ளார்.
வெனிசுலாவின் எண்ணெய் உற்பத்தியை அதிகரிக்க அமெரிக்க நிறுவனங்கள் சுமார் $100 பில்லியன் முதலீடு செய்ய உள்ளதால், வருங்காலத்தில் இந்தியாவுக்கான எண்ணெய் விநியோகம் தடையின்றி கிடைக்கும் என எதிர்பார்க்கப்படுகிறது.